以西結書 3 - 現代台語譯本漢字版(TTVH)-闽南语

1上帝對我講：「人子，將我互你此卷冊卷食落去，然後去對以色列人宣講。」

2所以我嘴擘開，伊就將彼卷冊互我食。

3伊閣講：「人子，著食我互你的冊卷，互你的腹肚飽淀。」我就食；冊佇我的嘴內甘甜若蜜。

4上帝給我講：「人子，去以色列人遐，將我的話給𪜶講。

5我毋是派你去語言得理解的民族遐，是派你去以色列人中間。

6我毋是派你去語言𣍐通，講什麼你攏聽無的民族遐；我若派你去𪜶中間，𪜶會聽你的話。

7毋拘以色列人民毋肯聽你的話，因為𪜶連我的話都毋聽。以色列人民固執，心肝硬。

8我欲互你意志堅定會當及𪜶對抗。

9我欲互你的意志親像鑽石，比火石閣較堅定。雖然𪜶是背逆的子民，你毋免驚𪜶，嘛毋免因為𪜶的面色著驚。」

10上帝閣對我講：「人子，我講的話，你著注意聽，嘛著囥佇心內。

11你著去流亡的同胞遐，不管𪜶欲聽抑是毋聽，著傳達我 — 至高的上主欲給𪜶講的話。」

12彼時，上帝的神給我夯起來，我就聽著我的後面有哄哄叫的聲，講：「著稱讚上主對伊遐所顯出的榮耀！」

13我閣聽見諸個活物佇空中啲飛，翼仔相磕的聲，嘛聽見𪜶的輪仔轉踅所發出親像大地動的聲。

14上帝的神給我夯起來，導我行，我的心艱苦閣受氣，上主的大氣力給我扼啲。

15按呢，我來到迦巴魯河邊的提勒‧亞筆，就是流亡的同胞住的所在。我鬱卒愣愣佇𪜶中間住七日。

上主派以西結作守望者(結 33.1-9)

16七日後，上主給我講：

17「人子，今我指派你做以色列人民的守望者。你著將我給你講警告的話給𪜶講。

18若是我宣布某一個邪惡的人一定著死，你無去給警告，勸伊改邪歸正，互伊通救家己，此個人雖然會因為家己的罪死，毋拘我欲對你追究伊死的責任。

19你若有警告彼個人毋通繼續作歹，毋拘伊無欲改邪歸正，伊會因為家己的罪死；伊的死，你毋免負責任。

20「若是義人離開正路去作歹，我欲互伊跋倒，互伊死。你若無警告伊，伊一定會死。伊欲因為家己的罪死，我無欲記念伊所做的好事，嘛欲對你追究責任。

21毋拘你若有警告伊毋通犯罪，伊嘛無閣犯罪，伊欲因為接受警告來活，你嘛欲救家己的性命。」

以西結暫時啞口

22上主的氣力充滿我；伊給我講：「起來，去山谷遐，我欲佇遐對你講話。」

23我就起來，去山谷，佇遐看見上主的榮光，及我佇迦巴魯河邊所看見的像款。我就仆落去土腳；

24上帝的神進入我內面，互我徛起來。上主對我講：「轉去，給家己關佇厝內。

25人子啊，人欲用索仔給你縛起來，互你𣍐當出去外面見人。

26我欲互你啞口𣍐講話，互你無法度警告許個背逆的人民。

27毋拘，我會閣對你講話，彼時，我會開你的嘴，你著傳達我 — 至高的上主欲給𪜶講的話。人若欲聽，互𪜶聽；人若毋聽，據在𪜶，因為𪜶是背逆的人民。」