利未記 19 - 現代台語譯本漢字版(TTVH)-闽南语

有關聖潔及正義的條例

1上主閣命令摩西

2著對以色列全體會眾宣布：

恁著分別作聖，因為我上主 — 恁的上帝是聖。

3恁逐個人攏著敬重恁的老母恁的老父。恁著守我的安歇日。我是上主 — 恁的上帝。

4恁毋通棄拺我去拜偶像，嘛毋通為著家己鑄造神像。我是上主 — 恁的上帝。

5恁刣牲生獻做平安祭互上主的時，著照規例獻祭物通互上主接納。

6祭物著佇奉獻彼日抑是隔日食；到第三日若猶有賰，著用火燒掉。

7留到第三日的祭物是無清氣；若有人食，伊的奉獻就𣍐得著接納。

8食的人，攏著對家己的罪負責任；因為伊褻瀆獻互上主分別作聖的物；彼個人著對人民的中間革出。

9恁收成五穀，園邊的毋通割了了，落落來的嘛毋通拾。

10收成葡萄，毋通挽了了，落落來的嘛毋通拾；著留互散赤人及出外人。我是上主 — 恁的上帝。

11毋通偷提；毋通詐欺；毋通講白賊。

12毋通奉我的名咒假誓來褻瀆你的上帝的名。我是上主。

13毋通欺壓你的同胞；毋通搶奪𪜶的物；毋通給工人的工錢留隔暝。

14毋通咒罵耳孔無聽見的人。毋通下物件佇失明的人的頭前害伊跋倒。著敬畏你的上帝。我是上主。

15恁審判毋通無公道；毋通偏袒散赤人，嘛毋通看有權勢的人的面色；著照公道審判你的同胞。

16毋通四界造謠中傷人；毋通做偽證害死人。我是上主。

17毋通心內怨恨厝邊；著誠懇指責伊的錯誤，才免著為伊的罪負責任。

18毋通給你的同胞報復，嘛毋通拾恨；著疼厝邊親像疼家己。我是上主。

19著遵守我的規例。毋通互無仝類的牲生交配；毋通將兩款種籽撒佇仝一坵園；毋通穿兩款布料織的衫。

20女婢猶未受贖得著自由，毋拘已經定婚，若有人及伊私通，兩個人著受刑罰；毋拘毋通給𪜶處死，因為彼個女婢猶未得著自由。

21彼個查甫人著獻賠罪祭，牽一隻綿羊來會幕門口，做賠罪祭獻互上主。

22祭司著用賠罪祭的羊，佇上主面前給伊贖罪；彼個人犯的罪就得著赦免。

23恁進入迦南地了後，栽種逐種果子樹，三年內，著看許個果子做無清氣，𣍐用得食。

24第四年所結的果子攏著分別作聖，表示對上主的感謝。

25到第五年，恁通食許個果子，互樹通結較多果子。我是上主 — 恁的上帝。

26毋通食含血的物。毋通行法術，嘛毋通卜卦。

27鬢邊的毛毋通剃，嘴鬚嘛毋通修。

28毋通為死人割傷家己的身軀；身軀嘛毋通刺字。我是上主。

29毋通侮辱你的查某子，互伊做寺廟的娼妓，才免恁去拜別個神明，互此個地充滿淫亂。

30恁著守我的安歇日，敬重我的聖所。我是上主。

31毋通去尋牽亡的，嘛毋通去問童乩、桌頭，來拍垃墋家己。我是上主 — 恁的上帝。

32佇老大人的面前，著徛起來，嘛著尊敬𪜶；閣著敬畏你的上帝。我是上主。

33毋通欺負寄居佇恁的地的外族人；

34著對待𪜶親像對待恁以色列同胞，疼𪜶親像疼家己；因為恁嘛曾做外族人寄居佇埃及地。我是上主 — 恁的上帝。

35毋通用無公道的尺、斗、秤仔偏人。

36著用公道的秤仔、磅子，及斗。我是導恁出埃及的上主 — 恁的上帝。

37恁著切實遵行我的規例及命令。我是上主。