1耶穌對聖殿出來的時，有一個門徒對伊講：「老師，你看，石即呢大塊！建築物即呢堂皇！」
2耶穌給𪜶講：「恁啲看諸個大的建築物噢。佇遮，諸個攏會受拆毀，拆甲無一塊石會疊佇別塊頂面。」
災難及迫害(太 10.17-22；24.3-14；路 21.7-19)3耶穌佇橄欖山頂，面向聖殿啲坐的時，彼得、雅各、約翰，及安得烈私下給伊問：
4「請給阮講，此個代誌什麼時會發生？諸個一切的代誌啲欲完成的時有什麼兆頭？」
5耶穌就給𪜶講：「著謹慎，才免受迷惑。
6有真多人會利用我的名來，講『我就是基督』來迷惑真多人。
7恁聽著戰爭以及戰爭的風聲的時，毋免驚。諸個代誌一定會發生，毋拘終局猶未到。
8因為民族會起來攻擊民族，國家攻擊國家。真多所在有地動，有飢荒。諸個代誌不過是催陣痛疼的開始。
9「恁家己著謹慎，恁會互人交互議會，佇會堂受鞭拍。恁會為著我的緣故徛佇總督及君王的面前，對𪜶做見證。
10毋拘福音一定著代先傳互萬民。
11𪜶給恁掠去交互法庭的時，毋免先煩惱欲講什麼，彼時恁得著什麼指示就照按呢講，因為啲講的毋是恁家己，是聖神。
12兄弟會出賣兄弟，互伊死；老父嘛會按呢對待子兒。子兒會起來攻擊父母，給𪜶害死。
13恁會因為我的名互眾人怨恨，毋拘忍耐到最後的人會得著救。」
大災難(太 24.15-28；路 21.20-24)14「當恁看著彼個『可惡的毀滅者』徛佇毋應該徛的所在 — 讀的人著明白此句話的意思 — 彼時佇猶太的人著逃走去山內；
15佇厝頂的，毋通落來，嘛毋通入去厝內提物件；
16佇園裡的，毋通轉去挔外衫。
17佇許個日子，有身孕的及互嬰仔食奶的婦仁人非常不幸！
18著祈禱，諸個代誌才免佇冬天發生。
19因為佇許個日子啲欲有災難，是對上帝創造萬物以來毋曾有的，將來嘛𣍐閣有。
20主若無減少許個日子，無人會得著救；毋拘為著伊所揀的選民，伊已經有減少許個日子。
21「彼時，若有人給恁講『恁看，基督佇遮』，抑是講『恁看，伊佇遐』，毋通相信。
22因為有一寡假基督及假先知會出現，行神跡奇事，若會當，連選民都欲給𪜶迷惑。
23著謹慎；我已經將一切攏先給恁講啦。」
人子的來臨(太 24.29-31；路 21.25-28)24「佇彼個災難過了許個日子，
日會變烏暗，
月𣍐發光，
25星會對天頂落落來，
天頂的光體攏會搖泏。
26彼時，人會看見人子充滿大權能及榮光坐雲來臨。
27伊會差遣天使對四方，對地的此旁到天的彼旁聚集伊的選民。」
對無花果樹學習(太 24.32-35；路 21.29-33)28「著對無花果樹學習：枝茁芛發葉的時，恁就知熱天啲欲到。
29親像按呢，恁看著諸個代誌發生的時就知人子已經接近，到門口啦。
30我實在給恁講，此世代猶未過去，這一切攏會發生。
31天及地會消失，毋拘我的話絕對𣍐消失。」
彼個日，彼個時，無人知(太 24.36-44)32「關係彼個日，彼個時，無人知；天頂的天使毋知，子嘛毋知，只有父知。
33著謹慎，著警醒，因為恁毋知彼個時刻什麼時會到。
34親像有一個人欲出外，將權交互僕人，分配工作互逐個人，閣吩咐守衛小心顧守。
35-36所以，著警醒，才免此家的主人忽然轉來，看著恁啲睏，因為恁毋知伊什麼時會轉來，是黃昏抑是半暝，是天欲光抑是日出的時。
37我給恁講的話嘛欲對眾人講：著警醒！」
Who We AreWhat We EelieveWhat We Do
2025 by iamachristian.org,Inc All rights reserved.
