歷代志下卷 13 - 現代台語譯本漢字版(TTVH)-闽南语

亞比雅及耶羅波安交戰(王上 15.1-8)

1 以色列王耶羅波安第十八年，亞比雅做猶大王，

2佇耶路撒冷作王三年；伊的老母叫做米該亞，是基比亞人烏列的查某子。

亞比雅及耶羅波安常常交戰。

3亞比雅導四十萬精兵出戰。耶羅波安嘛導八十萬特選的兵迎戰。

4 亞比雅徛佇以法蓮山區的洗瑪臉山，講：「耶羅波安及以色列人民，著聽我講！

5恁應該知，上主 — 以色列的上帝有及大闢立𣍐廢除的約，將以色列國永遠賜互大闢及伊的子孫。

6毋拘大闢的子所羅門的人臣，尼八的子耶羅波安，起來背叛伊的主人。

7伊招集一寡無路用的匪類，公然對抗所羅門的子羅波安；彼時羅波安猶少年無經驗，𣍐當抵抗𪜶。

8今恁靠恁人多，聲勢大，閣有耶羅波安為恁造的金牛仔做神明，欲反抗大闢的子孫所治理上主的國。

9恁豈毋是將上主的祭司，亞倫的子孫，及利未人趕走，照外國人的作法家己設立祭司？甚至無論什麼人牽一隻牛仔及七隻綿羊來，恁就給伊設立做所謂神明的祭司。

10「毋拘阮咧，上主是阮的上帝，阮無棄拺伊；阮有祭司，亞倫的子孫，及利未人啲執行服事上主的職務。

11逐日早暗，阮獻燒化祭，燒芳香，佇純金的桌排獻祭的餅互上主；逐下昏閣點金燈台的燈；因為阮遵守上主 — 阮的上帝的命令，毋拘恁棄拺伊。

12看咧，上帝及阮同在，閣領導阮；伊的祭司嘛大聲歕喇叭欲攻擊恁。以色列人啊，毋通及上主 — 恁列祖的上帝交戰，因為恁一定𣍐贏。」

13 耶羅波安召一部份的兵佇猶大人的後面埋伏，伊的軍隊對正面進攻。

14猶大人越頭看，看著𪜶前後受包圍，就求叫上主；祭司嘛歕喇叭。

15猶大人就大聲喝進攻。𪜶大聲喝的時，上帝就佇亞比雅及猶大人的面前拍敗耶羅波安及以色列的軍隊。

16以色列人佇猶大人的面前逃走；上帝將𪜶交佇猶大人的手。

17亞比雅及伊的軍兵大勝利；以色列人特選的兵受刣死的有五十萬。

18以色列人受制伏；猶大人得勝，因為𪜶倚靠上主 — 𪜶列祖的上帝。

19 亞比雅追趇耶羅波安，攻取伊幾若個城，就是伯特利、耶沙拿、以弗崙，以及諸個城附近的庄社。

20亞比雅在位的時，耶羅波安無閣再強盛；上主拍耶羅波安，伊就死。

21 亞比雅漸漸強盛。伊有某十四個、子二十二個、查某子十六個。

22亞比雅其他的事蹟及伊的所行所做，攏記載佇先知易多的評論集。