1恁著感謝上主，求叫伊的名，
佇萬民中報揚伊的作為。
2著對伊吟詩，向伊唱歌謳咾，
談論伊一切奇妙的所做。
3著誇耀伊的聖名。
願尋求上主的人心內歡喜。
4著倚靠上主及伊的權能，
不時尋求見伊的面。
5-6伊的僕人亞伯拉罕的後代，
伊所揀雅各的子孫啊，
恁著數念伊奇妙的作為，
數念伊的神跡及伊所講判斷的話。
7伊是上主 — 咱的上帝；
伊的審判普及全地。
8伊會記得伊的約直到永遠，
伊的應允直到萬代。
9伊會記得及亞伯拉罕立的約，
對以撒所立的誓。
10伊將此個約互雅各做規例，
互以色列做永遠的約。
11伊講：「我欲將迦南地賜互你，
做你應得的產業。」
12當時𪜶的人口有限，人數真少；
𪜶佇遐做出外人。
13𪜶對此族行到彼族，
對此國到彼國。
14伊無容允人壓迫𪜶；
為著𪜶的緣故，伊譴責許個君王。
15伊講：「毋通磕著我揀選的僕人，
嘛毋通欺負我的先知。」
16伊互飢荒降落佇彼個土地，
互所倚靠的米糧攏斷絕。
17伊差一個人先去，
就是受賣做奴隸的約瑟。
18人用腳銬銬伊的腳，
用鐵鍊鍊伊的頷頸。
19上主的話給伊考驗，
直到伊的預言實現。
20王差人給伊解開；
統治萬民的法老給伊解放。
21王設立伊做宰相，
掌管法老攏總的財物，
22通隨意縛伊的人臣，
用智慧管教伊的長老。
23 以色列嘛來到埃及；
雅各出外佇含的地。
24上主互伊的子民生湠真多，
互𪜶比對敵較強。
25伊改變對敵的心，互𪜶怨恨伊的子民，
用詭詰的計謀對待伊的僕人。
26伊差伊的僕人摩西，
及伊所揀的亞倫，
27佇對敵的中間行伊的神跡，
佇含的地行奇事。
28伊降落烏暗，地就暗摸摸；
埃及人猶久毋聽趁伊的話。
29伊互𪜶的水變做血，
水內的魚攏死。
30佇𪜶的土地田蛤仔滿滿是，
連王的房間都有。
31伊一下出聲，胡蠅歸陣飛來，
閣佇𪜶的境內有蝨母滿四界。
32伊落雹代替雨，
降落熠爁佇𪜶全地。
33伊掃倒𪜶的葡萄樹及無花果樹，
毀壞𪜶境內的樹木。
34伊一下出聲，歸群的草蜢及草蜢仔子就飛來，
多甲𣍐算得，
35給𪜶土地的菜蔬食了了，
閣吞食𪜶的田園所出的五穀。
36伊拍死𪜶國內所有的大子，
就是𪜶勇壯的時所生的。
37伊導𪜶出來，帶銀帶金；
伊的支族中無一個軟弱。
38𪜶出來的時，埃及人大歡喜，
因為埃及人真驚𪜶。
39伊用雲給𪜶遮，
暝時用火給𪜶照。
40𪜶一下求，伊就互鵪鶉飛來，
閣用天的食物互𪜶飽足。
41伊拍開石磐，水就淐出來，
成做河流流過曠野。
42因為伊會記得伊聖的應允，
會記得伊的僕人亞伯拉罕。
43伊導伊的子民歡歡喜喜出來，
導伊揀選的子民唱歡喜的歌向前行。
44伊將列國的土地賜互𪜶，
互𪜶承接別個民族勞苦得著的財富，
45通互𪜶遵趁伊的規例，
遵守伊的律法。
哈利路亞，稱讚上主！
Who We AreWhat We EelieveWhat We Do
2025 by iamachristian.org,Inc All rights reserved.
