利未記 10 - 現代台語譯本漢字版(TTVH)-闽南语

拿答及亞比戶的罪

1 亞倫的子拿答及亞比戶，提𪜶家己的香爐，貯火及香，佇上主的面前獻無神聖的火，毋是上主命令𪜶的。

2有火對上主發出，給𪜶燒死佇上主的面前。

3摩西對亞倫講：「上主曾按呢講：『親近我的人著尊我做聖；佇全體人民的面前，我欲得著榮光。』」亞倫恬恬無講話。

4 摩西叫亞倫的阿叔烏薛的子米沙利及以利撒反來，給𪜶講：「恁來，給恁此兩個親人對聖所拎出去營外。」

5𪜶兩人就來，照摩西的吩咐，扭彼兩個屍體的袍，給𪜶拎出去營外。

6 摩西對亞倫及伊的子以利亞撒、以他瑪講：「恁毋通給頭毛拍鬖，毋通拆裂衫哀傷，恁才免死，閣免互上主對會眾發受氣；毋拘恁的同胞以色列人通為著上主發出的火哀哭。

7恁嘛毋通離開會幕，恁才免死，因為恁是互上主抹油設立的。」𪜶就照摩西的話做。

祭司的條例

8上主吩咐亞倫講：

9「你及你的子入會幕的時，薄酒厚酒攏毋通飲，恁才免死；這欲做恁世世代代永遠的規例，

10互恁通分別聖抑是俗，清氣抑是無清氣；

11閣互恁通將上主通過摩西命令以色列人一切的規例教示𪜶。」

12 摩西對亞倫及伊所賰的子以利亞撒及以他瑪講：「恁用火燒獻互上主的素祭所賰的，著佇祭壇邊食諸個無摻酵的餅，因為這是至聖的。

13恁著佇聖的所在，就是會幕的埕食，因為這是用火燒獻互上主的祭物中間，你及你的子應得的份額；這是上主互我的命令。

14搖過獻互上主的胸坎肉及攑高獻互上主的大腿，你及你的子、查某子攏通佇禮儀上清氣的所在做夥食；因為諸個是以色列人平安祭的中間，你及你的子應得的份額。

15𪜶著將攑高的大腿、搖過的胸坎肉，及用火燒獻互上主的祭物的油做夥帶來，搖搖咧獻互上主；諸個永遠做你及你的子應得的份額；這是上主互我的命令。」

16後來，摩西急欲尋彼隻做贖罪祭的山羊。哪知，已經燒去啦。摩西就對亞倫猶活啲的子以利亞撒及以他瑪發受氣，講：

17「恁是按怎無佇聖的所在食此個贖罪祭？此個是至聖的。上主已經將此個互恁，欲除去會眾的罪過，佇上主的面前給𪜶贖罪。

18既然祭物的血無帶入聖所，恁就著照我的命令食。」

19 亞倫對摩西講：「今仔日𪜶佇上主的面前獻贖罪祭及燒化祭，毋拘我有抵著悲慘的代誌，若食贖罪祭，上主豈會歡喜？」

20摩西聽了，嘛感覺合理。