詩篇 6 - 現代台語譯本漢字版(TTVH)-闽南语

大闢的詩，交互聖樂長；用弦的樂器伴奏；調，降八度。祈求保護的早禱

1上主啊，求你毋通受氣責備我，

毋通發大受氣責罰我。

2上主啊，求你可憐我，因為我衰荏；

上主啊，求你醫治我，因為我的骨頭㘈㘈顫。

3我的心非常驚惶；

上主啊，你底時才欲救我？

4上主啊，求你越倒轉來救我的性命，

求你因為你的慈愛，拯救我。

5因為死人𣍐記念你；

佇陰府，啥人會感謝你？

6我因為哼哼呻厭倦；

我逐暝流目屎淹我的眠床，

濕霑我的床舖。

7我因為憂悶目睭拍歹，

因為對敵多，目睭花。

8恁做歹的人攏著離開我，

因為上主有聽見我啼哭的聲。

9上主有聽我的懇求；

上主欲接納我的祈禱。

10我的對敵攏會見笑大驚惶；

𪜶會忽然見笑撤退。