何西阿書 11 - 現代台語譯本漢字版(TTVH)-闽南语

上帝憐憫背叛的子民

1上主講：

以色列細漢的時我就疼伊；

我有召我的子出埃及

。

2我愈叫𪜶，𪜶愈走開；

𪜶給巴力獻祭，

對偶像燒香。

3我牽以法蓮的手教𪜶行；

毋拘𪜶毋知我有醫好𪜶，照顧𪜶。

4我用慈悲的索，仁愛的帶牽𪜶；

我對𪜶的頷頸夯開𪜶的軛，

俯落去養飼𪜶。

5𪜶毋肯轉來我遮；

按呢，𪜶一定會閣倒轉去埃及，

互亞述王統治。

6戰亂會臨到𪜶的城，

毀壞𪜶的城門，

破壞𪜶的計謀。

7我的子民堅決背叛我；

按呢，𪜶叫天，天𣍐應。

8 以法蓮啊，我哪甘棄拺你？

以色列啊，我哪甘將你交互別人？

我哪會互你親像押瑪，

對待你親像對待洗扁？

我的心已經改變；

我的情充滿憐憫。

9我𣍐發出猛烈的受氣，

𣍐閣毀滅以法蓮。

因為我是上帝，毋是世間人，

是佇恁中間至聖的上帝；

我𣍐閣對恁發受氣。

10上主會親像獅啲哮，

伊的子民會跟隨伊。

伊一下哮，𪜶就愕愕惙對西旁趕來；

11𪜶會親像雀鳥愕愕惙對埃及飛來，

親像粉鳥對亞述趕來。

我欲互𪜶住佇家己的厝。

上主按呢宣布。

以色列及猶大受譴責

12 以法蓮用白賊，

以色列家用詭詐包圍我；

猶大嘛背叛上帝，

對神聖的上帝無忠實。