1上主按呢講：
「看咧，我欲用毀滅的大風
攻擊巴比倫及伊的人民。
2我欲派外國人來侵犯巴比倫，
親像大風啲簸麥穗；
𪜶欲給伊的國土簸甲空空空。
毀滅的日一下到，
𪜶欲對四周圍來攻擊巴比倫。
3毋通互巴比倫射箭的兵射箭，
毋通互𪜶有機會武裝起來；
𪜶的少年人恁毋免給𪜶珍惜，
著給𪜶全部的軍隊消滅。
4 巴比倫人會佇家己的城市受刣，
佇逐條街路互人屠殺。
5 以色列及猶大雖然佇逐所在得罪我以色列神聖的上帝，
毋拘𪜶猶無互上主 — 萬軍的統帥、𪜶的上帝棄拺。
6著趕緊逃走，離開巴比倫，
隨人顧性命。
毋通因為𪜶的罪，及𪜶做夥滅亡；
因為上主報仇的時已經到，
我欲互巴比倫受報應。
7 巴比倫以前是上主手中的金杯，
互全地的人攏飲甲醉茫茫；
列國曾飲伊的酒，飲甲發狂。
8 巴比倫會忽然倒壞，毀滅。
恁著為伊哀哭！
著給伊抹乳香，減輕伊的痛疼，
伊可能猶醫會好。」
9住佇巴比倫的外國人講：
「阮曾想欲醫巴比倫，毋拘無效。
現在咱著離開，
逐個人倒去家己的故鄉；
因為巴比倫所欲受的刑罰真大，
大甲抵天，迵到穹蒼。」
10上主的子民啲歡呼：
「上主已經宣布咱公義無罪。
來！咱著佇錫安宣揚上主 — 咱的上帝的作為。」
11上主決定欲毀滅巴比倫，就激動米底亞的君王來攻擊伊；這是上主欲報仇，欲為著伊受毀壞的聖殿報復。指揮官下令：
「箭磨互尖，
盾牌攑互牢。
12𫞼大旗做信號，
攻擊巴比倫的城牆；
加強顧守守望台，
派衛兵輪班，閣派人埋伏。」
關係巴比倫住民的命運，上主按呢決定，嘛按呢實現。
13 巴比倫啊，你的境內有真多河流，
閣積聚真多財寶，
毋拘你的終局到啦！
你的性命到遮為止！
14上主 — 萬軍的統帥指家己立誓講：
「我欲召集親像草蜢赫呢多的大軍，
侵佔恁的土地；
𪜶會對恁發出勝利的歡呼。」
稱讚上主15上主用家己的大能創造大地，
用伊的智慧堅立世界，
用聰明搋開穹蒼。
16上主一下出聲，天頂的水就絞滾，
雲霧就對天邊海角淐出來；
伊對雨的中間射出熠爁，
對伊的倉庫送風出來。
17世間人攏愚戇無知；
逐個拍金師傅攏為著家己造的神像見笑；
因為𪜶鑄的神像攏是虛假，內面無性命。
18偶像攏是虛假，
是人恥笑的對象；
刑罰一下到，𪜶攏會消失。
19作雅各產業的上帝及𪜶無仝款；
伊是創造萬有的主；
以色列是伊的子民，是伊的產業。
伊的稱呼是上主 — 萬軍的統帥。
上主的鐵鎚20上主講：
「巴比倫啊，你是我的鐵鎚及武器；
我曾用你摃碎列邦，
毀滅列國；
21曾用你拍敗戰馬及騎馬的；
拍碎戰車及駛車的；
22曾用你刣死查甫人及婦仁人；
刣死老人及囝仔；
刣死少年人及少女；
23曾用你刣死牧者及伊的羊群；
刣死作穡人及伊的牛；
刣死總督及官員。」
刑罰巴比倫24上主講：「恁欲親目看著我報應巴比倫及伊的住民，因為𪜶作歹傷害錫安。
25 巴比倫啊，你是毀滅全地的大山；
你看，我欲攻擊你，
欲伸手對山巖給你捙落去，
互你變做燒毀的山。
26人𣍐閣對你遐提石頭做厝角石，
抑是做地基；
因為你會永遠荒廢。」
上主按呢宣布。
27「著佇境內𫞼大旗做信號，
佇列國中歕哨角，
召集列國來攻擊巴比倫。
著招集亞拉臘、米尼、亞實基拿來攻擊巴比倫；
閣派將軍指揮作戰，
召集親像草蜢赫呢多的馬兵上來。
28著招集列國、米底亞的君王、
總督、官員，及𪜶所管逐國的軍隊，
來攻擊巴比倫。
29地大振動閣轉踅；
因為上主攻擊巴比倫的旨意已經確定，
欲互巴比倫的土地荒廢，無人徛起。
30 巴比倫的勇士無欲閣交戰，
攏匿佇堡壘內面；
𪜶氣力用盡，
親像婦仁人無力仝款。
巴比倫的厝宅互火燒了了，
𪜶的城門互人挵破。
31送批的連續走來，
報消息的一個閣一個，
攏走來欲報互巴比倫王知，
城逐旁攏互人攻破，
32河的渡口互敵人佔去，
水池的蘆葦互火燒去，
戰士攏驚甲破膽。
33上主 — 萬軍的統帥、以色列的上帝宣布：
巴比倫會親像五穀場，
互人踏甲平平平；
閣無偌久，收成的時就到啦！」
上主欲幫贊以色列34 耶路撒冷人講：
「巴比倫王尼布甲尼撒給阮吞滅，
給阮硩碎，
閣互阮親像摒空的器具；
伊親像海怪給阮吞落去，
將阮的寶貝食了了，就給阮呸出來。」
35 錫安的住民講：
「巴比倫人虐待阮及阮的親族，
願𪜶受報復！」
耶路撒冷人講：
「𪜶流阮的血，願𪜶諸個罪受報應！」
36所以上主按呢講：
「看咧，我欲替恁申冤，
欲為恁報仇；
我欲互巴比倫的河無水，
互伊的水源攏焦去。
37 巴比倫欲變做土堆，
成做豺狼住的所在，
互人著驚恥笑，
無人徛起。
38 巴比倫親像勇猛的獅噤噤哮，
閣親像細隻獅啲叫。
39-40𪜶的食慾一下起，我就替𪜶辦桌，
互𪜶快樂，互𪜶飲甲酒醉，
永遠睏𣍐醒。
我欲親像啲趕羊仔，
趕綿羊、山羊，
趕𪜶落去屠殺場。」
上主按呢宣布。
巴比倫的命運41上主講：
「巴比倫
竟然受攻破！全世界攏啲稱讚的大城竟然受佔領！
列國看著伊攏著驚！
42海水漲高，淹過巴比倫；
嘩嘩哮的海湧給伊蓋起來。
43 巴比倫的城鎮拋荒，
土地焦硞硞，變做沙漠，
無人徛起，嘛無人經過。
44我欲刑罰巴比倫的神明彼勒，
叫伊吐出吞落去的財物；
列國𣍐閣去敬拜伊。
「巴比倫的城牆倒壞啦！
45我的子民啊，著趕緊逃走，離開巴比倫！
逐個人救家己的性命，閃避上主的大受氣。
46恁毋通失膽，
毋免因為境內的風聲驚惶；
因為每年攏有風聲傳來，
境內有強暴的事，
領袖互相鬥爭。
47看咧，時日一定會到，
我欲刑罰巴比倫的偶像。
巴比倫全國攏會抵著見笑；
受刣的人會倒甲滿四界。
48-49彼時，毀滅者對北方來到巴比倫，
天地及其中所有的欲因為巴比倫倒壞歡呼。
巴比倫佇世界逐所在刣死真多人，
嘛刣死真多以色列人，
為著按呢，伊會受毀滅。」
上主按呢宣布。
互佇巴比倫的以色列人的信息50上主講：
「恁已經閃避刀劍，
著緊走，毋通徛𫢶遐。
恁雖然離開故鄉真遠，
著會記得上主，著數念耶路撒冷。
51恁講：『阮聽著人啲詈罵就感覺漏氣，
滿面見笑，
因為外邦人入去上主聖殿的聖所。』
52所以，時日一定會到，
我欲刑罰巴比倫的偶像；
巴比倫國內有多多人受傷啲哼哼呻。
53 巴比倫雖然𬦰上天，
閣強化堡壘，
我猶原欲差毀滅者對付伊。」
上主按呢宣布。
巴比倫會滅亡54「對巴比倫傳出哀哭的聲，
佇巴比倫發生大毀滅。
55因為上主欲毀滅巴比倫，
城內無閣有喧嘩的聲。
對敵的軍隊親像湧浪浪哮，
發出響亮的聲。
56有毀滅者來攻擊巴比倫；
巴比倫的勇士互人掠去，
𪜶的弓受遏折；
上主是刑罰的上帝，
一定會報應巴比倫。
57我欲互巴比倫的貴族、智慧的人、總督、官員，以及勇士
攏飲甲酒醉，
永遠睏𣍐醒。」
大君王，上主 — 萬軍的統帥按呢宣布。
58上主 — 萬軍的統帥按呢講：
「巴比倫寬闊的城牆會全部倒壞，
高大的城門會互火燒燒去。
萬民所勞碌的攏無採工，
萬國所勞力的攏燒了了；
𪜶就攏厭倦。」
耶利米的信息傳到巴比倫59 猶大王西底家坐位第四年，瑪西雅的孫，尼利亞的子西萊雅做王宮總管；伊及王做夥去巴比倫的時，先知耶利米有話吩咐伊。
60耶利米將啲欲臨到巴比倫的災禍，就是有關巴比倫一切的話，攏寫佇一捲冊。
61耶利米對西萊雅講：「你去到巴比倫的時，著宣讀寫佇此個冊卷的話。
62閣著祈禱講：『上主啊，關係此個所在，你曾講你欲毀滅，互伊永遠拋荒，無人徛起，連牲生嘛走了了。』
63西萊雅，你給此卷冊宣讀了後，著給伊縛佇一塊石頭，㧒落去幼發拉底河，
64然後講：『巴比倫會親像按呢沉落去，𣍐閣興起；人民嘛攏厭倦，因為上主欲降災禍互𪜶。』」
耶利米的話到遮結束。
Who We AreWhat We EelieveWhat We Do
2025 by iamachristian.org,Inc All rights reserved.
