以斯拉記 9 - 現代台語譯本漢字版(TTVH)-闽南语

譴責及外族通婚

1諸個代誌完成了後，有一寡以色列的領袖來見我，講：「以色列人民、祭司及利未人，無及此所在的迦南人、赫人、比利洗人、耶布斯人、亞捫人、摩押人、埃及人、亞摩利人隔離，閣學𪜶做可惡的事。

2𪜶為著家己及𪜶的子，娶外族的女子做某，致到上主聖潔的子民及此所在的人摻插；閣領袖及官長佇此項事導頭做歹。」

3我一下聽著此個代誌，就拆裂衫及外袍，惙頭毛及嘴鬚，著驚痛心坐啲。

4因為流放倒來的人所犯的罪，所有為著以色列上帝的話愕愕惙的人攏聚集來我遮；我著驚痛心坐啲，到獻下昏祭的時。

5獻下昏祭的時，我無閣禁食，就穿拆裂的衫及外袍，雙腳跪落去，向上主 — 我的上帝攑起雙手祈禱，

6講：「我的上帝啊，我非常見笑，毋敢攑頭向我的上帝，因為阮的罪淹過頭殼，阮的罪過抵天。

7對阮列祖的時到今仔日，阮的罪過真重；因為阮的罪，你將阮及阮的列王、祭司，攏交佇外邦列王的手，受殺害，受掠，受搶劫，受侮辱，親像今仔日按呢。

8現在，上主 — 阮的上帝抵即施恩互阮，閣留阮諸個賰落來的人，互阮通安全徛起佇你聖的所在，通閣看著光明，佇受壓制做奴隸的中間有復興的機會。

9阮是奴隸，毋拘做奴隸的時，上帝你無棄拺阮，互阮對波斯的皇帝得著恩典，閣互阮復興，會當重建上帝你的聖殿，修理毀壞的所在，互阮佇猶大及耶路撒冷有城牆保護。

10「阮的上帝，既然你施恩互阮，阮猶有什麼話通講，因為阮已經棄拺你的命令。

11你有通過你的僕人眾先知命令阮，講：『恁欲去佔領做產業的地是受污染的地，因為許個國的人民的污穢，及𪜶所做可惡的事，此個地對此旁到彼旁充滿污穢。

12恁若欲強盛，享受此個土地的好物，閣留此個地互恁的子孫做永遠的產業，恁就毋通互恁的子以及查某子及𪜶通婚，永遠毋通幫贊𪜶得著平安繁榮。』

13阮抵著諸個災難，攏是因為阮的歹所行及阮的大罪，毋拘，上帝，你刑罰阮，比阮應該承受的較輕，閣留阮諸個賰落來的人。

14阮豈通閣違背你的命令，及做可惡的事的人民通婚？阮若按呢做，你一定會對阮發受氣，消滅阮，互阮無一個留落來，無一個逃脫。

15上主 — 以色列的上帝，你是公義的，阮諸個賰落來的人才得著逃脫，親像今仔日按呢。今，阮佇你的面前有罪；無一個人會堪得徛佇你的面前。」