詩篇 28 - 現代台語譯本漢字版(TTVH)-闽南语

大闢的詩。求幫贊的祈禱

1上主啊，我求叫你；

我的石磐啊，毋通毋插我。

你若對我靜靜，

我就親像入墓壙孔的人。

2我求叫你，向你的至聖所攑手祈禱的時，

求你聽我懇求的聲。

3毋通將我及歹人，以及作惡的人做一下消滅；

𪜶及厝邊講和平的話，毋拘心陰險。

4願你照𪜶的所做，照𪜶所行的歹代報應𪜶。

願你照𪜶的手的所做報應𪜶，

照𪜶應該受的給𪜶處罰。

5因為𪜶藐視上主的作為，及伊的手所做的；

伊會毀壞𪜶，𣍐給𪜶重建。

6上主應該受稱讚，

因為伊有聽我懇求的聲。

7上主是我的氣力，我的盾牌；

我倚靠伊。

上主幫贊我，我的心大歡喜；

我欲用詩歌稱讚伊。

8上主是伊子民的氣力，

是伊選立的王得救的避難所。

9求你解救你的子民，賜福互做你產業的子民；

求你做𪜶的牧者永遠扶持𪜶。