傳道書 10 - 現代台語譯本漢字版(TTVH)-闽南语

1死去的胡蠅互歸罐芳油發出臭味；小可的愚戇比智慧及尊貴較有力。

2智慧的人的心向正路；愚戇的人的心向偏路。

3愚戇的人欠缺智慧，連出門嘛沿路顯出家己是戇人。

4掌權者若對你發受氣，毋通離開你的職位，因為冷靜會當互你避免大過失。

5我看著日光的下面有一項不幸，是掌權者造成的錯誤，

6就是安排戇人坐高位，好額人坐低位。

7我看見奴僕騎馬，貴族親像奴僕行路。

8掘陷坑的人會家己跋落彼內面；拆牆的人會互蛇咬著。

9拍石的人會互石傷著；破柴的人會互柴摃著。

10斧頭鈍，若無磨互利，就著加出真多力；活用智慧，會贊人成功。

11弄蛇的猶未弄，就互蛇咬著，伊就免閣弄。

12智慧的人講話人人合意；愚戇的人開嘴家己惹災禍。

13戇人開嘴講戇話，到尾變𤞚話。

14戇人厚話，話講𣍐煞。

人毋知將來會按怎；伊死後發生的代誌，啥人會當給伊講？

15戇人出戇力拼甲倦篤篤，連入城的路都尋無。

16若囝仔作王，官長透早就啲宴樂，彼個國家有災禍啊。

17若尊貴的人作王，官長照時飲食，毋是因為好酒，是為著欲得著氣力，彼個國家真有福氣。

18貧憚，厝蓋會塌落去；手無愛振動，厝會漏。

19宴席互人歡喜，酒互人快樂，錢銀解決萬事。

20毋通咒詛君王，連想嘛毋通；佇房間內毋通咒詛好額人，因為空中的鳥仔會傳播此個消息，有翼的會傳話。