以賽亞書 26 - 現代台語譯本漢字版(TTVH)-闽南语

勝利的歌

1彼日，佇猶大地人會唱此首歌：

阮有一個堅固的城；

上主用勝利做城牆及堡壘。

2著拍開城門，

互忠信正義的人民入來！

3心堅定的，你賜𪜶平安繁榮，

因為𪜶信靠你。

4著永遠信靠上主，

因為上主 — 咱的上帝是永遠的石磐。

5伊給坐高位的人拖落來，

拆毀起佇高的所在的城，

給伊擲佇土腳，

互伊變做土粉，

6互人踐踏；

散赤人給伊踐，

困苦人給伊踏。

7正直的人路平坦；

公義的主，你給正直人的路鋪平修直。

8上主啊，佇你審判的路，

阮啲聽候你；

阮的心渴慕你受尊崇的名。

9佇暝時，我的心神欣慕你；

我的神魂迫切尋求你。

因為你佇地上施行審判的時，

世間的住民學習正義。

10邪惡的人就是得著仁慈，

嘛學𣍐著公義。

佇正直人的地，𪜶猶原做歹，

𪜶看𣍐著上主的威嚴。

11上主啊，你手攑高欲刑罰𪜶，

毋拘𪜶無看見。

求你互𪜶看見你對你子民的熱愛，

家己感覺見笑。

願你用火吞滅你的對敵。

12上主啊，願你賜阮平安繁榮，

因為阮的所做你攏有給阮成就。

13上主 — 阮的上帝啊，

曾有別個主管轄阮，

毋拘阮只有尊崇你的名。

14死去的人𣍐當閣活起來；

𪜶的陰魂嘛𣍐當閣起來。

所以，你處罰𪜶，毀滅𪜶，

互𪜶對人的記憶中消失。

15上主啊，你互阮的國民增加，

互國民加添來顯示你的榮耀。

你互阮的國土擴展到天邊海角。

16上主啊，𪜶佇艱難中尋求你；

你管教𪜶的時，

𪜶吐氣對你祈求。

17產婦啲欲生，

催陣，痛疼，喉叫；

上主啊，阮佇你面前嘛親像按呢。

18阮懷孕，痛疼攪絞，

不過生攏無；

阮無為國家帶來解救，

無為人民貢獻什麼。

19毋拘阮死去的同胞會閣活，

𪜶的屍體會閣起來。

住佇塵埃的人啊，醒起來，歡喜唱歌！

你的露水是閃熠的甘露，

落佇地，互死去的人活起來。

審判及復興

20今，我的子民啊，入去恁的房間；

門著閂互牢。

恁著暫時匿起來，

一直到上帝的大受氣煞。

21恁看，上主啲欲對伊住的所在出來，

欲刑罰地面上犯罪的人。

地會暴露𪜶刣人所流的血，

𣍐閣掩蓋𪜶殺害的人的屍體。