何西阿書 14 - 現代台語譯本漢字版(TTVH)-闽南语

以色列著回歸上主

1 以色列啊，你的罪有互你跋倒，

著越頭歸向上主 — 你的上帝；

2著倒轉來歸上主，

給欲講的話準備好勢；

著對伊講：「求你赦免阮攏總的罪，

用恩典接納阮，

阮就用稱讚代替牲禮。

3 亞述𣍐當救阮；

阮無欲閣騎馬出戰，

無欲閣對阮造的偶像講：

『你是阮的上帝。』

因為阮諸個做孤兒的只有會當對你得著憐憫。」

應允以色列新性命

4上主講：

我欲醫好以色列的背叛，

盡情疼𪜶，

因為我已經對𪜶煞我的受氣。

5我欲親像甘露降落互以色列，

𪜶就親像百合花開花，

親像黎巴嫩的柏香樹釘根。

6𪜶的枝伸長，

會茂盛親像橄欖樹；

𪜶的芳味親像黎巴嫩的柏香樹。

7𪜶會倒轉來𫢶佇我的蔭影下，

會親像五穀生長，

葡萄樹開花；

𪜶的好名聲親像黎巴嫩的酒。

8 以色列啊，我及偶像有什麼關係？

我欲應答恁，看顧恁，

欲親像青翠的松樹致蔭恁。

我是一切福氣的源頭。

9有智慧的人會明白諸個事。

明理的人會了解諸個一切。

上主的道路正直；

義人一定會行諸個路，

毋拘背逆的人會佇諸個路跋倒。