希伯來書 1 - 現代台語譯本漢字版(TTVH)-闽南语

上帝通過伊的子對咱講話

1上帝佇古早有通過伊的眾先知，真多遍，用真多方式對咱的祖先講話，

2毋拘佇終末的日子，通過伊的子對咱講話。上帝有指定伊作萬有的繼承人，閣有通過伊創造宇宙。

3伊反射上帝的榮耀，是上帝本質的真像。伊用伊權能的話扶持萬有，洗除人的罪了後，坐佇至尊至高上帝的正旁。

子比天使較偉大

4上帝有賜子比眾天使較尊貴的名，互伊成做比天使較偉大。

5上帝毋曾對任何一個天使講：

你是我的子，

我今仔日生你。

伊嘛毋曾對任何一個天使講：

我欲做伊的父，

伊欲做我的子。

6閣上帝差遣伊的大子入世間的時，伊講：

上帝所有的天使攏著拜伊。

7關係天使，伊講：

上帝用風做伊的天使，

用火焰做伊的差用。

8毋拘關係子，伊講：

上帝啊，你的寶座永永遠遠存在；

你的國的權柄是正直的權柄。

9你意愛公義，怨恨不法。

所以，上帝 — 你的上帝揀選你，

用歡喜的油抹你，超過抹你的同伴。

10伊閣講：

主啊，你佇起頭給地下地基；

天嘛是你親手創造。

11天地攏會消失，

毋拘你永遠存在。

天地攏會親像

衣服漸漸舊，

12你會親像捲外衫給𪜶捲起來；

𪜶會親像衣服改變。

毋拘你永遠𣍐改變；

你的歲壽無窮盡。

13上帝豈曾對叨一個天使講：

你坐我的正旁，

聽候我互你的對敵屈服佇你腳下？

14天使攏是啲服事的神，受差派去服務啲欲領受拯救的人。