詩篇 56 - 現代台語譯本漢字版(TTVH)-闽南语

大闢的金詩，佇迦特互非利士人掠著的時做的，交互聖樂長；調，用「遠遠無聲的粉鳥」。信靠上帝的祈禱

1上帝啊，求你憐憫我，因為人踐踏我，

歸日攻擊壓制我。

2我的對敵歸日踐踏我；

至高的上帝啊，攻擊我的人真多。

3我驚惶的時，我欲倚靠你。

4我倚靠上帝，我欲稱讚伊應允的話；

倚靠上帝，我就無驚。

會死的人會當給我按怎？

5𪜶歸日歪曲我的話，

所想的攏是欲害我。

6𪜶聚集，埋伏，啲相我的腳步，

當等欲害我的性命。

7𪜶做歹豈會當逃脫？

上帝啊，求你發受氣互諸個對敵屈服。

8我的悲傷，你有記錄；

求你將我的目屎收佇你的皮袋。

諸個豈無攏記佇你的冊？

9我求叫的時，對敵攏會越轉身退去；

我知，上帝為我。

10我倚靠上帝，我欲稱讚伊應允的話；

我倚靠上主，我欲謳咾伊的話。

11我倚靠上帝，我就𣍐驚；

人會當給我按怎？

12上帝啊，我欲照我向你所下的願，

對你獻謝恩的祭。

13因為你有救我的性命脫離死亡，

保護我的腳無跋倒，

互我得著活命的光引導，行佇你面前。