1上主命令摩西，講：
2「你著對逐個支族選一個族長，派𪜶去探查我欲賜互以色列人的迦南地。」
3摩西就照上主的命令，派逐支族的族長對巴蘭的曠野出發。
4諸個族長的名記佇下面：
呂便支族是撒刻的子沙慕亞
5 西緬支族是何利的子沙法
6 猶大支族是耶孚尼的子迦勒
7 以薩迦支族是約瑟的子以迦
8 以法蓮支族是嫩的子何西阿
9 便雅憫支族是拉孚的子帕提
10 西布倫支族是梭底的子迦疊
11 約瑟的後代瑪拿西支族是穌西的子迦底
12 但支族是基瑪利的子亞米利
13 亞設支族是米迦勒的子西帖
14 拿弗他利支族是縛西的子拿比
15 迦得支族是瑪基的子臼利
16以上是摩西派去探查彼個地的人的名。摩西給嫩的子何西阿號名做約書亞。
17 摩西派𪜶去探查迦南地的時，對𪜶講：「恁去尼革夫，𬦰上山，
18看彼個地生做什麼款：遐的住民是強抑是弱，人數多抑是少，
19住的地是好抑是僫，住的所在是無城牆的營地抑是堅固的城。
20閣看彼個土地是肥抑是瘦，有樹木抑無。恁著勇敢，將彼所在的果子帶一寡倒來。」彼時抵仔是葡萄初熟的時。
21𪜶就去探查，對尋的曠野到利合的地區，直到哈馬隘口。
22𪜶閣對尼革夫上去希伯崙；此個城比埃及的瑣安城較早七年起造，有亞衲族的亞希幔人、示篩人、達買人住佇遐。
23𪜶到以實各山谷，剉一枝葡萄樹椏，頂面有一葩葡萄，需要兩個人扛；閣帶一寡石榴及無花果倒來。
24因為以色列人對遐剉一葩葡萄，彼個所在就叫做以實各
山谷。25𪜶探查彼個地四十日久，才倒來。
26𪜶來到巴蘭曠野的加低斯，見摩西、亞倫，及以色列的會眾，給𪜶回報歸個行程，閣互𪜶看彼所在的果子。
27𪜶對摩西講：「你派阮去探查彼個地區，果然是流奶及蜜的地；諸個就是彼個所在的果子。
28毋拘彼所在的住民真勇，城大閣堅固；阮佇遐嘛看著亞衲族。
29亞瑪力人住佇尼革夫地區；赫人、耶布斯人、亞摩利人住佇山地；迦南人住佇海邊及約旦河邊。」
30 迦勒佇摩西的面前互人民安靜落來，講：「咱趕緊來去攻佔彼個所在；咱一定會贏。」
31毋拘許個及伊做夥去的人講：「咱無法度攻擊許個人民；𪜶比咱較勇。」
32許個去探查的人對以色列人散布謠言，講：「阮探查行過的地是吞食人的地，閣看著的住民攏真大漢。
33阮看著的亞衲族的人就是大漢人，𪜶是大漢人的後代；及𪜶比起來，咱親像草蜢，𪜶看咱嘛是按呢。」
Who We AreWhat We EelieveWhat We Do
2025 by iamachristian.org,Inc All rights reserved.
