士師記 6 - 現代台語譯本漢字版(TTVH)-闽南语

1 以色列人閣做上主看做歹的事，上主就將𪜶交佇米甸人的手七年。

2米甸人比以色列人較強；以色列人為著欲逃避米甸人，就佇山裡挖山洞，起要塞。

3以色列人逐遍撒種了後，米甸人、亞瑪力人，及東旁的部族攏來攻擊𪜶，

4佇遐紮營，將彼所在到迦薩歸個地區的農作物攏毀壞，嘛無留牛、羊、驢，及食物互以色列人。

5𪜶帶牲生及布棚來，人額及駱駝算𣍐了；𪜶親像歸群草蜢毀壞彼個地區。

6以色列人因為米甸人的緣故，悽慘落魄，就求叫上主。

7 以色列人因為米甸人的緣故求叫上主，

8上主就差先知去𪜶遐，對𪜶講：「上主 — 以色列的上帝按呢講：『我有導恁對埃及做奴才的家出來。

9我救恁脫離埃及人及所有壓制恁的人的手，佇恁的面前給𪜶趕走，將𪜶的土地賜互恁。

10我嘛曾對恁講：我是上主 — 恁的上帝，所以恁雖然住佇亞摩利人的地，毋拘毋通拜𪜶的神明；總是恁毋肯聽我的話。』」

11上主的使者到俄弗拉，坐佇亞比以謝宗族的人約阿施的橡樹腳；彼時約阿施的子基甸佇酒窟遐啲拍麥，毋愛互米甸人看著。

12上主的使者對基甸顯現，對伊講：「強猛的勇士，上主及你同在。」

13 基甸對伊講：「先生，上主若及阮同在，是按怎阮會即呢悽慘？阮的祖先所給阮講『上主導阮出埃及』許個奇事佇叨位？今上主已經放拺阮，將阮交互米甸人。」

14上主對基甸講：「你著用你的氣力去解救以色列人脫離米甸人的手。我現在就差派你去。」

15 基甸應伊講：「主啊，我哪有法度解救以色列？阮的宗族是瑪拿西支族中上卑微的，我是阮兜上細的。」

16上主對伊講：「我欲及你同在；你欲拍敗米甸人，親像啲拍一個人。」

17 基甸講：「我若對你得著恩典，求你互我一個證據，互我知及我講話的就是上主你。

18請你毋通離開遮，聽候我倒來，帶禮物獻互你。」

上主講：「我會聽候你倒來。」

19 基甸就去準備一隻山羊仔，用十公斤麵粉做無酵餅；肉下佇籃仔，用鍋仔貯湯，帶到橡樹腳獻互上主。

20上帝的使者對伊講：「肉及無酵餅下佇此個石磐頂，湯倒出來。」伊照按呢做。

21上主的使者伸出手裡攑的柺仔，用枴仔尾揬肉及無酵餅，就有火對石磐𤏸起來，將肉及無酵餅攏燒去；上主的使者就對基甸的目睭前消失。

22 基甸知伊是上主的使者，就講：「慘啊！至高的上主啊，我當面看著上主的使者。」

23上主對伊講：「安心，毋免驚；你𣍐死。」

24基甸就佇遐給上主起一座祭壇，號名叫做「上主沙龍」。此個壇到今仔日猶佇亞比以謝族的俄弗拉。

25彼暝，上主吩咐基甸，講：「你牽恁老父的牛，就是伊另外一隻七歲的牛來，閣拆毀恁老父為巴力起的祭壇，剉壇邊的亞舍拉柱像，

26佇此個要塞頂面，照規定，為上主 — 你的上帝起一座壇，獻彼隻牛做燒化祭，用你所剉的亞舍拉柱像做起火的柴料。」

27基甸就導十個僕人，照上主的吩咐去做；伊因為驚家族及城內的人，毋敢佇日時做此個代誌，就佇暗時做。

28城內的人透早起來，看著巴力的壇已經拆毀，壇邊的亞舍拉柱像互人剉掉，第二隻牛獻佇新起的祭壇。

29𪜶講來講去：「這什麼人做的？」𪜶查問了後，就講：「這是約阿施的子基甸做的。」

30城內的人對約阿施講：「給你的子交出來，互伊死，因為伊拆毀巴力的壇，剉壇邊的亞舍拉柱像。」

31 約阿施給所有攻擊伊的人講：「恁欲為巴力辯護是無？恁欲救伊是無？若有人為巴力辯護，天猶未光以前著互彼個人死。巴力若是神，著互伊家己為著伊的壇受拆毀辯護。」

32對彼日起，人給基甸叫做耶路巴力，意思是「互巴力及伊爭辯」，因為伊毀壞巴力的壇。

33彼時米甸人、亞瑪力人，及東旁的部族攏聚集，過約旦河，佇耶斯列山谷紮營。

34上主的神臨到基甸，伊就歕哨角；亞比以謝宗族的人攏聚集跟隨伊。

35伊派使者去瑪拿西全地區，瑪拿西人就聚集來隨伊。伊閣另外派使者去亞設、西布倫、拿弗他利地區，諸個支族的人嘛攏來會合。

36 基甸對上帝講：「你若真正應允欲通過我解救以色列，

37我會下歸領羊毛佇五穀場；若干焦羊毛有露水，土腳攏焦焦，我就知你欲照你的應允，用我解救以色列。」

38代誌果然按呢發生。隔日透早，基甸起來，捘羊毛，對羊毛捘一碗淀淀的露水出來。

39基甸閣對上帝講：「懇求你毋通受氣，我閣求一遍就好。求你互我閣用羊毛試一遍，此遍只有互羊毛焦焦，土腳攏有露水。」

40彼暝上帝嘛按呢做，羊毛焦焦，土腳攏是露水。