詩篇 12 - 現代台語譯本漢字版(TTVH)-闽南语

大闢的詩，交互聖樂長；調，降八度。求幫贊的祈禱

1上主啊，求你拯救。

虔誠的人無去啦；

世間忠信的人絕滅啦。

2人人對厝邊講白賊；

𪜶講扶挺的話，嘴講一款，心想一款。

3求上主封密扶挺的嘴唇，

割斷講大話的舌。

4𪜶講：「阮欲靠嘴舌較贏；

嘴唇是阮的，啥人會當給阮控制？」

5上主講：「為著困苦人的枉屈，及散赤人的吐氣，

今我欲起來，給𪜶安置佇𪜶切切欣慕安全的所在。」

6上主的話純全，

親像銀佇土造的火爐煉七遍。

7-8無路用的人互世間人看重；

歹人逐所在威風聳勢。

上主啊，求你保護阮，

庇祐阮永遠脫離此世代的人。