彌迦書 3 - 現代台語譯本漢字版(TTVH)-闽南语

指責以色列的領袖

1我講：雅各的首領，以色列人的官長，著聽！

恁豈毋知什麼是公平？

2恁厭惡良善，意愛邪惡；

恁剝人的皮，剔人的骨。

3恁食我子民的肉，

剝𪜶的皮，

摃斷𪜶的骨頭，

剁一塊一塊，

親像欲落鼎煮的肉。

4有一日，恁欲求叫上主，

毋拘伊𣍐應答恁；

彼時伊會面越走毋插恁，

因為恁有做邪惡的事。

5有關導我的子民行迷路的先知，上主按呢講：

𪜶的嘴若有物通哺，就講「平安和平」；

人若無用物塞𪜶的嘴，𪜶就對許個人宣戰。

6所以，暝時欲到，恁看𣍐著異象；

烏暗欲來，恁𣍐當卜卦。

對恁諸個先知，

日頭會落去，日時會變暗暝。

7彼時，先見會見笑，卜卦的會漏氣；

𪜶攏掩嘴恬去，

因為上帝無回應。

8我咧，上主的神互我充滿氣力、正義感，及勇氣，

通對雅各宣告伊的過失，

對以色列指出伊的罪。

9 雅各的首領，以色列人的官長，著注意聽！

恁厭惡正義，

顛倒是非。

10恁用血建立錫安，

用罪惡起造耶路撒冷。

11恁的首領審判的時收賄賂，

祭司為著工錢教示，

先知為著錢解說上帝的指示；

𪜶竟然敢奉上主的名講：

「上主佇咱中間，

災禍𣍐臨到咱。」

12所以，因為恁的緣故，錫安會親像田園互人犁，

耶路撒冷會變做土堆，

此個殿的山會變做樹林的山崙仔。