約拿書 3 - 現代台語譯本漢字版(TTVH)-闽南语

尼尼微人悔改

1上主的話第二遍傳互約拿，講：

2「起來，你去尼尼微彼個大城，將我交代你的信息對𪜶宣布。」

3約拿隨時起來，照上主的話去尼尼微。尼尼微是非常大的城，著三日才行會透。

4頭一日，約拿入城，宣布講：「閣四十日，尼尼微會毀滅。」

5 尼尼微人信上帝，就宣布禁食，對大到細攏穿麻衫懺悔。

6此個消息傳到尼尼微王遐；伊就對王位起來，褪禮服，穿麻衫，坐佇火灰。

7伊閣對尼尼微人宣布講：「王及大臣下令：人及牲生、牛群羊群，攏不准食物件 — 毋通互𪜶食，毋通互𪜶飲。

8人及牲生攏著穿麻衫。逐個人著迫切求叫上帝，著悔改棄拺歹行為及暴力。

9無定著上帝會回心轉意，無發大受氣互咱滅亡。」

10上帝看著𪜶的所做，有悔改放棄𪜶的歹行為，就改變心意，無將所講的災禍降落佇𪜶身上。