1上主按呢講：
「恁著維護公平，實踐公義；
因為我的拯救近啦，
我的公義連鞭實現。
2堅守安歇日，攏無違背，
手無作歹，
此款人真有福氣！」
3已經歸信上主的外族人毋通講：
「上主一定會給我及伊的子民隔離。」
太監嘛毋通講：
「我不過是一欉焦去的樹。」
4因為上主按呢講：
「許個遵守我的安歇日，
做我所歡喜的事，
持守我的約的太監，
5我欲互𪜶佇我的聖殿、我的牆圍內
有紀念碑，有名號，
比有真多子、查某子較好；
我欲賜𪜶永遠𣍐互人擦消的名。
6「許個歸信上主的外族人
欲侍奉我，敬愛我上主的名，
閣做我的僕人；
𪜶攏遵守安歇日，無干犯濫用，
確實持守我的約，
7我欲導𪜶到錫安 — 我的聖山，
互𪜶佇我祈禱的殿內面有歡喜；
我嘛欲接納𪜶獻佇我祭壇頂的燒化祭及祭物。
因為我的殿欲叫做萬民祈禱的殿。」
8至高的上主有招集流亡的以色列子民倒轉來，伊按呢講：
「已經倒轉來的子民以外，
我嘛欲招集閣較多人來歸倚𪜶。」
以色列的領袖受譴責9上主講：
「田野的走獸啊，攏來！
樹林內的野獸啊，攏來吞食！
10 以色列的守望者攏睛瞑，
攏無智識；
𪜶是𣍐吠的狗，
歸日倒啲睏，啲作夢。
11𪜶攏是貪食的狗，歸日食𣍐飽。
諸個牧者無智識；
逐個人行家己的路，
追求家己的利益。
12𪜶講：『來！咱來去買酒，
飲厚酒，飲互夠氣。
明仔載會及今仔日像款，
甚至閣較讚！』」
Who We AreWhat We EelieveWhat We Do
2025 by iamachristian.org,Inc All rights reserved.
