詩篇 7 - 現代台語譯本漢字版(TTVH)-闽南语

有關便雅憫人古實的代誌，大闢對上主唱的歌。祈求公義的審判

1上主 — 我的上帝啊，求你做我的避難所保護我；

求你解救我脫離一切追趕我的人！

2若無，𪜶會親像獅拆裂我，

拆甲碎糊糊嘛無人通救我。

3-4上主 — 我的上帝啊，我的手若有做毋著，

有對朋友用歹報好，

抑是無緣無故搶奪敵對我的人；

我若有做諸個代誌，

5就出在對敵趇我，到掠著我，

將我的性命踏佇土腳，

將我的尊嚴變做土粉。

6上主啊，求你起來，發出受氣，

徛起來對付我對敵的大受氣；

求你為著我醒起來，照你的旨意審判。

7願萬民攏聚集佇你周圍；

願你坐佇寶座治理𪜶。

8上主審判萬民。

上主啊，求你裁判，

判我做義，定我無罪。

9求你互歹人𣍐閣做歹，互義人徛在；

因為公義的上帝監察人的心腸。

10上帝是我的盾牌；

伊拯救心正直的人。

11上帝是公義的審判官；

伊逐日對不義的人發受氣。

12人若毋反悔，伊會磨伊的刀，

扭開伊的弓準備好勢。

13伊準備致命的武器；

伊射的是火的箭。

14你看，歹人圖謀邪惡，

懷孕毒害，生出奸詐。

15伊挖窟，掘互伊深，

竟然跋落家己設的陷阱。

16伊的毒害會倒轉到家己的頭殼；

伊的強暴會落佇家己的頭殼頂。

17我欲因為上主的公義感謝伊；

我欲稱讚上主 — 至高上帝的名。