詩篇 79 - 現代台語譯本漢字版(TTVH)-闽南语

亞薩的詩。求主解救阮的國家

1上帝啊，外邦人侵佔你的領土，

拍垃墋你的聖殿，

互耶路撒冷變做荒廢的所在。

2𪜶將你僕人的身屍交互空中的飛鳥做食物，

將你聖的子民的肉互地上的野獸吞食。

3𪜶佇耶路撒冷周圍流你子民的血親像啲摒水，

嘛無人給𪜶埋葬。

4阮受著隔壁國凌辱，

互四圍的人冷笑譏刺。

5上主啊，你欲受氣偌久，豈欲到永遠？

你的大受氣親像火欲𤏸偌久？

6求你將你的受氣摒落佇許個毋識你的外邦，

以及許個無求叫你的名的列國。

7因為𪜶吞食雅各，

互伊徛起的所在拋荒。

8求你毋通因為阮祖先犯的罪刑罰阮；

求你將你的慈悲緊緊施落互阮，

因為阮陷落絕望的地步。

9救阮的上帝啊，求你因為你的名的榮光幫贊阮；

因為你的名的緣故救阮，赦免阮的罪。

10哪欲互列國講：「𪜶的上帝佇叨位？」

求你為著你僕人流的血申冤，

互外邦人知，閣互阮親目看見。

11求你互囚犯的吐氣透到你的面前，

照你的大權能，保存受判死刑的人的性命。

12主啊，阮隔壁國對你的凌辱，

求你加添七倍還互𪜶。

13按呢，阮做你的子民，你草埔的羊的人，

會感謝你到永遠，

稱讚你的名到萬世代。