約書亞記 1 - 現代台語譯本漢字版(TTVH)-闽南语

上帝命令約書亞征服迦南

1上主的僕人摩西死了後，上主對摩西的助手，嫩的子約書亞，講：

2「我的僕人摩西已經死；今你及所有的人民著準備好勢，過約旦河，去我所欲賞賜以色列人的地。

3照我對摩西的應允，恁的腳踏過的地，我攏欲賜互恁。

4恁的領土欲對南旁的曠野到北旁的黎巴嫩，對東旁的大河，就是幼發拉底河，赫人的全地，直到日落彼旁的地中海。

5你一世人無人會當贏過你；我按怎及摩西同在，嘛欲按呢及你同在；我一定𣍐離開你，嘛𣍐放拺你。

6你著勇敢壯膽，因為你欲導此個人民征服我對𪜶的祖先立誓欲賜互𪜶的地。

7你一定著勇敢壯膽，遵行我的僕人摩西所命令你一切的律法，毋通偏左偏右。按呢，你無論去叨位攏會事事順利。

8你著常常讀此個律法的冊，暝日亦讀亦想，互你遵行此本冊所記一切的話；按呢你的路就會平坦，事事亨通。

9我命令你：著勇敢壯膽，毋通驚，毋通懍；因為你無論去叨位，上主 — 你的上帝一定及你同在。」

約書亞準備過約旦河

10對按呢，約書亞命令人民的官長，

11去營中逐所在吩咐人民，講：「著準備糧食，因為三日內，恁欲過約旦河，入去承接上主 — 恁的上帝欲賜互恁的地。」

12 約書亞吩咐呂便人、迦得人，及瑪拿西半支族的人，講：

13「恁著會記得上主的僕人摩西命令恁的話：上主 — 恁的上帝欲將恁佇遮安穩徛起的地賞賜恁。

14恁的某、囝仔，及恁的牲生，攏通住佇約旦河東旁，摩西分配互恁的地；毋拘恁中間所有強猛的勇士，攏著帶軍器，做恁同胞的先鋒過河，及𪜶做夥作戰，

15直到上主互恁的同胞及恁像款，得著上主 — 恁的上帝賞賜𪜶安穩徛起的地。彼時恁才通倒來恁所得著做產業的地，就是上主的僕人摩西分配互恁佇約旦河東旁的地。」

16𪜶應約書亞講：「你吩咐阮的，阮攏欲照按呢做；你派阮去叨位，阮攏欲去；

17阮以前按怎順趁摩西，嘛欲按呢順趁你。願上主 — 你的上帝及你同在，親像及摩西同在仝款。

18無論什麼人違背你的命令，無欲順趁你的話，著互伊死。你一定著勇敢壯膽！」