以西結書 19 - 現代台語譯本漢字版(TTVH)-闽南语

1你著為以色列的領袖唱哀歌：

2你的老母是獅母，仆佇獅群的中間；

伊佇勇猛的獅中間養育細隻獅。

3伊給一隻細隻獅仔飼大隻，

互伊成做少壯的獅，

學會曉掠獵物，吞食人。

4列國聽見，就用陷坑給伊掠起來，

用鉤仔給伊拖去埃及。

5獅母看見伊的期待落空，心絕望；

就閣飼一隻細隻獅仔，

互伊成做少壯的獅。

6少壯的獅佇獅群中行來行去；

伊學會曉掠獵物，吞食人。

7伊破壞城堡，毀壞城鎮；

伊噤噤哮，眾人驚惶，全地拋荒。

8周圍的列國對四面圍攻伊；

𪜶設羅網，挖陷坑，給伊掠起來。

9𪜶用鉤仔給伊鉤啲，關入籠仔內，

帶去巴比倫王遐；

𪜶給伊關佇堅固的監牢，

以色列的眾山無閣聽見伊噤噤哮的聲。

10你的老母親像葡萄樹，

栽佇溪水邊，

因為水源充足，

枝葉茂盛，𠢕結果子。

11伊的樹枝勇閣碇，

通做統治者的柺。

此欉樹大欉，比茂盛的樹椏較高；

伊的樹枝抽高，遠遠就看會著。

12毋拘，此欉葡萄樹，因為上帝的受氣，

連根拔起來，㧒佇土腳，

果子互東風吹焦，

碇的樹枝受遏斷枯焦，

互火燒燒去。

13今伊受徙栽佇曠野，

種佇焦燥無水的所在。

14樹欉𤏸火，燒毀樹椏及果子；

伊無閣有碇的樹枝通做統治者的柺。

這是一首哀歌；此首哀歌一直流傳。