何西阿書 10 - 現代台語譯本漢字版(TTVH)-闽南语

1 以色列是𠢕生湠，𠢕結果子的葡萄樹。

果子結愈多，祭壇就起愈多；

土地出產愈豐富，石柱像就造愈媠。

2𪜶的心詭詐，一定著受定罪；

上主欲拆𪜶的祭壇，毀𪜶的石柱像。

3彼時𪜶會講：

阮無王，阮無啲驚上主。

有王，伊會當替阮做什麼？

4𪜶空嘴哺舌，濫糝咒誓立約；

𪜶互公義變做不義，

親像園溝的毒草四界生湠。

5 伯‧亞文的牛仔像受毀壞；

撒馬利亞的住民驚惶，

為著牛仔像哀傷，

𪜶的祭司悲哀，因為金牛已經失去榮光。

6𪜶的牛仔像會互人扛去亞述，

做禮物送互亞述大王；

以法蓮會受凌辱，

以色列因為拜偶像見笑。

7 撒馬利亞的王會消失，

親像水面的柴幼仔。

8 亞文 的山頭壇，

以色列犯罪的所在，會受毀滅；

許個祭壇會互莿及蒺藜蓋滿；

人民會對大山講「給阮蓋起來」，

對小山講「給阮硩落來」。

9 以色列啊，恁對基比亞事件以來繼續啲犯罪。

恁繼續得罪我，

想講佇基比亞攻擊犯罪的人的戰爭𣍐臨到恁。

10我一定會來刑罰諸個犯罪的人；

𪜶犯雙層的罪，

列國會聚集來攻擊𪜶。

11 以法蓮是好教的牛母，愛碖五穀；

我將軛掛佇伊媠閣勇的頷頸。

我欲互以法蓮拖車，

互猶大犁田，

互雅各耙鬆田土。

12著為家己開墾拋荒的地，

種公義，收慈愛。

現在是尋求上主的時；

伊來的時，欲互公義親像雨水降落互恁。

13恁種邪惡，收罪過，

食白賊結的果子。

恁倚靠家己的氣力，

靠勢恁有真多勇士。

14所以，戰亂的喊喝會臨到你的人民，

你所有的堡壘會互人拆毀，

親像亞述王沙勒幔佇戰爭的時

拆毀伯‧亞比勒；

彼時老母及𪜶的子兒攏會互人摔死。

15 伯特利人啊，恁罪大惡極，

會抵著像款的災禍；

天一下光，以色列王就會受消滅。