詩篇 85 - 現代台語譯本漢字版(TTVH)-闽南语

可拉後代的詩，交互聖樂長。求上主恩待伊的子民

1上主啊，你有施恩互你的地；

以色列受掠的人你有解救𪜶倒來。

2你有赦免你子民的罪惡，

擦消𪜶一切的罪過。

3你有收回你攏總的受氣，

煞你猛烈的受氣。

4拯救阮的上帝啊，求你互阮倒轉來，

煞你對阮的受氣。

5你豈欲永遠對阮受氣？

豈欲繼續受氣到萬代？

6你豈毋閣給阮救活，

互你的子民因為你來歡喜？

7上主啊，求你互阮經驗你不變的疼，

將你的救恩賜互阮。

8我欲聽主上帝所欲講的話；

因為伊欲對伊的子民，就是聖的子民，應允賜平安繁榮；

總是𪜶毋通倒轉去行愚戇的路。

9伊一定會拯救敬畏伊的人，

互伊的榮光臨在佇咱境內。

10慈愛及信實相抵；

公義及和平相攬。

11信實對地發出；

公義對天降落。

12上主賜好物；

咱的土地大豐收。

13公義會行佇上主頭前，

為伊準備道路。