1「嘴焦的人，來，遮有水！
無錢的人嘛來，來買，來食！
來買酒，買奶！
毋免錢，毋免代價。
2哪著開錢買𣍐食得的物？
哪著用勞苦賺的錢買食𣍐飽的物？
恁注意聽我講，就有好物通食，
通享受上好的食物，互恁滿足。
3「恁著俯耳孔聽，來就近我；
著聽，恁才會活。
我欲及恁立永遠的約，
互恁得著我應允大闢彼個確實不變的疼。
4我有指派伊做萬國的見證人，
做萬民的領袖統治𪜶。
5你看，你會召集你以前毋識的國民；
毋識你的國民攏會闖來投靠你。
上主 — 你的上帝欲促成此個事；
以色列神聖的上帝欲互你受尊重，得著榮耀。」
6著趁上主尋會著的時，尋求伊；
趁伊佇身邊的時，求叫伊。
7邪惡的人著棄拺𪜶的道路；
不義的人著改變𪜶的想法。
𪜶著歸向上主，伊會憐憫𪜶；
著歸向咱的上帝，伊會寬宏赦免𪜶。
8上主講：
「我的意念毋是恁的意念；
我的道路毋是恁的道路。
9天比地較高，
像款，我的道路比恁的道路較高，
我的意念嘛比恁的意念較高。
10「親像雨及雪對天降落，無閣倒轉，
欲潤澤大地，
互五穀茁芛大欉，
互撒種的有種籽，互人有米糧；
11對我的嘴講出的話嘛會按呢；
我的話絕對會實現，𣍐落空。
我的話欲完成我的計劃；
我的話欲成就我愛做的代誌。
12「恁會歡歡喜喜離開，
受引導平平安安轉去。
大山小山會佇恁面前出聲唱歌；
田野的樹木會拍噗仔歡喜。
13以前有莿的所在會發松柏；
有草刺的所在會發長青樹。
這欲做永久不滅的記號，
互恁會記得上主的作為。」
Who We AreWhat We EelieveWhat We Do
2025 by iamachristian.org,Inc All rights reserved.
