士師記 16 - 現代台語譯本漢字版(TTVH)-闽南语

參孫佇迦薩

1 參孫來迦薩，佇遐看著一個妓女，就及伊睏。

2有人給迦薩人講：「參孫來到咱遮。」𪜶就透暝給伊包圍，歸暝靜靜佇城門埋伏；𪜶講：「天光咱就通刣伊。」

3參孫睏到半暝，起來，將城門的門扇、兩支門徛，及門栱，攏拆起來，下佇肩頭，夯去希伯崙對面的山頂。

4後來，參孫佇梭烈山谷愛著一個女子黛利拉。

5非利士人許個首領去尋彼個女子，給伊講：「你著給參孫落話，看伊是按怎即呢有氣力；阮著按怎做，才會當較贏伊，給伊縛起來，給伊制伏。阮逐個人就互你一千一百塊銀。」

6 黛利拉就給參孫講：「請你給我講，你是按怎即呢有氣力；著按怎才會當給你縛起來，給你制伏。」

7 參孫應講：「人若用七條猶未焦的索仔給我縛，我就及普通人像款無氣力。」

8 非利士人許個首領就提七條猶未焦的索仔互黛利拉，伊就用這給參孫縛起來。

9彼時已經有人佇伊的內房啲當等；伊喝講：「參孫，非利士人來欲掠你！」參孫就擦斷索，親像擦斷火燒過的麻絲；按呢，伊大氣力的祕密人猶原毋知。

10 黛利拉給參孫講：「你給我騙，講白賊。今你著給我講，按怎才會當給你縛起來。」

11 參孫應講：「人若用毋曾用過的新索仔給我縛，我就及普通人像款無氣力。」

12 黛利拉就用新的索仔給伊縛起來，對伊講：「參孫啊，非利士人來欲掠你！」彼時，埋伏的人匿佇內房；參孫就擦斷縛佇伊手骨的索，親像擦斷一條線。

13 黛利拉給參孫講：「你到今猶騙我，講白賊。請你給我講，按怎才會當給你縛起來？」

參孫應講：「你若將我七股的頭毛及織布的線織做夥，用杙仔釘啲，就會當。」

14 黛利拉趁參孫啲睏的時，將伊的頭毛及織布的線織做夥，用杙仔固定，然後喝講：「參孫啊，非利士人來欲掠你！」參孫醒起來，將杙仔、織布機的梭及線，做一下拔出來。

15 黛利拉給伊講：「你無真正信任我，哪會當講你愛我？你已經騙我三遍，無給我講，你的氣力對叨位來。」

16黛利拉逐日用話給催給逼，互伊的心煩甲欲死。

17參孫就將心內的祕密攏給伊講：「我的頭毛攏毋曾用剃頭刀剃過，因為我對出世就奉獻互上帝做拿細耳人。若給我的頭毛剃起來，我的氣力就失去，我就無力，及普通人像款。」

18 黛利拉知影參孫將心內的祕密攏給伊講，就差人去給非利士人的首領講：「請恁閣來一遍，因為伊已經將心內的祕密攏給我講啦。」非利士人的首領就帶銀去黛利拉遐。

19黛利拉互參孫睏佇伊的腳頭窩，叫一個人來給參孫七股的頭毛剃起來。按呢，黛利拉互參孫失去氣力。

20黛利拉喝講：「參孫啊，非利士人來欲掠你！」參孫醒起來，想講：「我欲親像前彼幾遍家己弓開。」毋拘，伊毋知上主已經離開伊。

21非利士人給伊掠起來，挖伊的目睭，帶伊去迦薩，用銅鍊給伊鍊啲，互伊佇監裡挨磨。

22總是伊的頭毛剃起來了後，閣漸漸長起來。

參孫的死

23 非利士人的首領聚集，欲獻大祭祀互𪜶的神明大袞，歡喜慶祝；𪜶講：「咱的神明已經將咱的對敵參孫交佇咱的手。」

24人民看著參孫，就謳咾𪜶的神明，講：「咱的對敵毀壞咱的土地，刣死足多咱的人，今咱的神明已經將伊交佇咱的手。」

25𪜶非常快樂的時，講：「叫參孫出來，互咱戲弄𨑨迌。」𪜶就給參孫對監裡押出來；伊就互人戲弄；𪜶互伊徛佇兩支柱的中間。

26參孫給牽伊的手的囝仔講：「請你互我摸著撐廟的柱，互我倚𪜶。」

27彼時廟內男女揢甲滿滿，非利士人的首領嘛攏佇遐；佇廟頂的平台啲看參孫互人戲弄的男女，大約有三千人。

28 參孫對上主求叫，講：「至高的上主，求你會記得我。上帝啊，此一遍就好，求你賜我氣力，互我為著兩蕊目睭對非利士人報仇。」

29參孫就攬撐廟的兩支中柱，正手攬一支，倒手攬一支。

30參孫講：「互我及非利士人做夥死。」伊屈身出大力，廟就倒，硩死許個首領及內面所有的人。按呢，參孫最後刣死的人，比活啲的時刣死的閣較多。

31 參孫的兄弟及伊老父的親族，攏落來收伊的身屍，給伊扛上去安葬佇瑣拉及以實陶的中間，𪜶老父瑪挪亞的墓。參孫做以色列的士師二十年。