詩篇 84 - 現代台語譯本漢字版(TTVH)-闽南语

可拉後代的詩，交互聖樂長；用迦特的樂器伴奏。欣慕上帝的殿院

1上主 — 萬軍的統帥啊，

你徛起的所在互人赫呢意愛！

2我戀慕上主的埕到欲暈去！

我的心神向永活的上帝歡喜唱歌。

3上主 — 萬軍的統帥，我的王，我的上帝啊，

雀鳥仔佇你的祭壇邊作巢；

連燕仔嘛佇遐為著家己尋著攔子的巢。

4徛起佇你殿的埕的人真有福氣！

𪜶稱讚你無煞！

5對你得著氣力的人真有福氣！

𪜶迫切愛上錫安山朝聖。

6𪜶經過的焦燥山谷攏變做泉源；

秋雨降落，福氣滿滿。

7𪜶愈行愈有力，

攏欲佇錫安朝見上帝。

8上主 — 萬軍的統帥上帝啊，求你聽我的祈禱！

雅各的上帝啊，求你俯耳孔來聽！

9保護阮的上帝啊，求你眷顧！

求你賜福互你所設立的王！

10佇你的埕𫢶一日，

較贏佇別位𫢶一千日！

我寧可佇我上帝的厝顧門，

嘛毋願𫢶佇邪惡的人的厝內。

11因為主上帝是日頭，是盾牌：

伊互咱恩惠及光榮；

伊毋曾留一項好物無互正直的人。

12上主 — 萬軍的統帥啊，信靠你的人真有福氣！