提多書 2 - 現代台語譯本漢字版(TTVH)-闽南语

健全的教義

1總是你，你的教導著符合健全的教義。

2著勸老人愛節制，有好品格，守己，著有健全的信心、疼心，及耐心。

3你嘛著按呢勸老婦仁人行為謹慎，毋通講人的是非，毋通作酒的奴才，著用好模範教示人，

4才通訓練少年婦仁人疼丈夫，及疼子兒，

5閣著守己，貞潔，𠢕理家，親切，順服丈夫，上帝的道理才𣍐受誹謗。

6親像按呢，你嘛著苦勸少年查甫人守己。

7你家己凡事著有好行為作好模範，誠懇穩重教示人，

8言辭端正，無通指責，互反對的人無通講咱的歹話，家己煞感覺見笑。

9作奴隸的著順服家己的主人，事事互𪜶歡喜；毋通應嘴應舌；

10毋通偷提，著事事忠實良善，互咱的救主上帝的教示佇逐方面閣較有光彩。

11因為上帝已經顯明伊的恩典欲拯救全人類，

12訓練咱棄拺無敬虔的生活及屬世的慾望，佇現今的時代過守己、正直，及敬虔的生活，

13聽候彼個充滿福氣的向望，就是至尊的上帝以及咱的救主耶穌基督榮耀的顯現。

14基督為著咱獻家己，是欲救贖咱脫離一切的罪惡，互咱成做伊純潔的子民歸屬伊，熱心做好事。

15諸個事，你著講，著勸勉，充分運用職權責備人。毋通互人看輕。