創世記 16 - 現代台語譯本漢字版(TTVH)-闽南语

夏甲及以實瑪利

1 亞伯蘭的某莎萊無生子；伊有一個女婢夏甲是埃及人。

2莎萊給亞伯蘭講：「上主互我𣍐生。請你及我的女婢同房，豈採我會當對伊得著一個後生。」亞伯蘭聽趁莎萊的話。

3亞伯蘭的某莎萊就將伊的女婢埃及人夏甲互伊的丈夫亞伯蘭做某；彼時亞伯蘭已經住佇迦南地十年。

4伊及夏甲同房，夏甲就懷孕。夏甲知家己有身，就看輕女主人。

5 莎萊給亞伯蘭講：「我受委屈攏是你害的。我將我的女婢送互你做某；伊一下知家己有身，就看輕我。願上主佇你我的中間主持公道。」

6 亞伯蘭對莎萊講：「伊是你的女婢，你會當照你的意思對待伊。」莎萊給伊苦毒，伊就逃走離開莎萊。

7上主的使者佇曠野的水泉邊抵著夏甲；彼個水泉是佇欲去書珥的路中。

8上主的使者對伊講：「莎萊的女婢夏甲，你對叨位來，欲去叨位？」

伊講：「我對我的女主人莎萊遐逃走出來。」

9上主的使者對伊講：「你著轉去你的女主人遐，順服伊。」

10上主的使者閣對伊講：「我欲互你的後代多甲𣍐算得。」

11上主的使者閣對伊講：

今你懷孕，欲生一個子；

著給伊號名叫做以實瑪利

，

因為上主聽著你的苦情。

12伊會親像野驢；

伊欲攻擊人，

人嘛欲攻擊伊；

伊欲及伊的兄弟做對頭。

13 夏甲就稱呼彼位對伊講話的上主做「看顧的上帝」；伊講：「我看見上帝，我竟然猶活啲！」

14所以此個井就叫做比珥‧拉海‧萊

；此個井佇加低斯及巴列的中間。

15後來，夏甲給亞伯蘭生一個後生，亞伯蘭給伊號名叫做以實瑪利。

16夏甲給亞伯蘭生以實瑪利的時，亞伯蘭八十六歲。