詩篇 64 - 現代台語譯本漢字版(TTVH)-闽南语

大闢的詩，交互聖樂長。祈求上帝保護

1上帝啊，我埋怨的時，求你聽我的聲；

求你保護我的性命免驚對敵的陷害。

2求你將我囥密，互我脫離邪惡的人的陰謀，

脫離做歹的人的計謀。

3𪜶磨𪜶的舌親像磨刀；

𪜶用惡毒的話做箭啲瞄準，

4埋伏欲射無辜的人；

𪜶忽然射伊，手嘛無惙。

5𪜶參詳歹計謀；

暗中設計，張羅網，

講：「啥人會看著咱？」

6𪜶圖謀歹代，

講：「阮已經有想出上精密的計謀。」

人的心思念頭實在有夠詭詐。

7毋拘上帝欲用箭射𪜶；

𪜶會忽然著傷。

8𪜶會互家己講的話害死；

看見的人攏會搖頭。

9眾人攏會驚惶，

欲報揚上帝的所做，

詳細想伊的作為。

10義人會因為上主來歡喜，

嘛會倚靠伊得著安全。

所有心正直的人攏會稱讚伊。