何西阿書 5 - 現代台語譯本漢字版(TTVH)-闽南语

1祭司啊，著聽！

以色列子民，著注意聽！

王親啊，著斟酌聽！

恁啲欲受審判，

因為恁佇米斯巴成做害人的活罩，

佇他泊山成做當人的羅網。

2諸個背叛的人大開殺戒，

我欲管教𪜶攏總的人。

3 以法蓮啊，我真了解你；

以色列𣍐當對我掩蓋。

今，以法蓮，你行淫亂，

以色列給家己拍垃墋。

警告拜偶像的人

4𪜶的所行所做互𪜶𣍐當歸向上帝；

因為𪜶的心充滿淫亂，

完全毋識上主。

5 以色列的驕傲證明𪜶家己有罪；

以法蓮會因為家己的罪跋倒失敗；

猶大會及𪜶像款失敗。

6𪜶欲導牛群羊群去尋上主，毋拘尋𣍐著，

因為上主已經離開𪜶。

7𪜶對上主無忠實，及別人偷生子；

初一的慶典以前，𪜶及𪜶的產業攏會受毀壞。

猶大及以色列的戰爭

8著佇基比亞歕哨角，佇拉瑪歕喇叭，

佇伯‧亞文發出警報。

便雅憫啊，著注意你的後面！

9刑罰的日若到，以法蓮會荒廢；

我欲對以色列逐支族宣告，

宣告將來一定會發生的事。

10 猶大的首領竟然霸佔人民的土地；

我欲將我的受氣親像大水摒落佇猶大。

11 以法蓮甘願去隨無路用的偶像；

𪜶一定會受審判，受壓迫踐踏。

12我欲親像蛀蟲對待以法蓮，

嘛欲互猶大爛去。

13 以法蓮看著家己有病，猶大看著本身有傷；

以法蓮就派人去求亞述大王；

毋拘伊𣍐當醫𪜶的病，治𪜶的傷。

14我欲親像獅對待以法蓮，

親像猛獅對待猶大；

我欲給𪜶拆碎，拖走；

無人會當救𪜶。

15今我欲倒去我的所在，

聽候𪜶承認家己的罪，祈求見我的面；

𪜶佇急難的時，會迫切尋求我。