士師記 13 - 現代台語譯本漢字版(TTVH)-闽南语

1 以色列人閣做上主看做歹的事；上主給𪜶交佇非利士人的手四十年。

2彼時，有一個但支族的瑣拉人，叫做瑪挪亞；伊的某無懷孕，無生。

3上主的使者對彼個婦仁人顯現，給伊講：「你以前𣍐懷孕，𣍐生子，毋拘現在你欲懷孕生一個子。

4所以你著細膩，薄酒厚酒毋通飲，律法規定無清氣的物攏毋通食。

5你欲懷孕生一個子，毋通給伊剃頭；因為此個囝仔對胎裡就歸上帝做拿細耳人；伊欲開始解救以色列人脫離非利士人的手。」

6婦仁人去給伊的丈夫講：「有一個上帝重用的人來我遮，伊的容貌親像上帝的使者，互人驚畏。我無問伊對叨位來，伊嘛無給我講伊的名；

7毋拘伊對我講：『你欲懷孕生一個子，所以薄酒厚酒毋通飲，無清氣的物攏毋通食，因為此個囝仔對胎裡到伊死彼日，欲歸上帝做拿細耳人。』」

8 瑪挪亞就求上主講：「主啊，求你互你所差上帝重用的人閣來阮遮，通教導阮按怎對待此個啲欲出世的囝仔。」

9上帝聽瑪挪亞的懇求。婦仁人坐佇園裡的時，上帝的使者閣來伊遐；毋拘伊的丈夫瑪挪亞無及伊做夥。

10婦仁人趕緊走去報伊的丈夫，給伊講：「彼日來我遮彼個人閣對我顯現。」

11 瑪挪亞趕緊隨伊的某去彼個人遐，對伊講：「你豈是對阮某講話彼個人？」

伊講：「是。」

12 瑪挪亞講：「你的話實現了後，阮著按怎教此個囝仔？伊著守什麼規矩？」

13上主的使者對瑪挪亞講：「我給此個婦仁人講的代誌，伊攏著謹慎；

14所有葡萄樹出的物毋通食，薄酒厚酒毋通飲，一切無清氣的物嘛毋通食。我給伊吩咐的，伊攏著遵守。」

15 瑪挪亞對上主的使者講：「請留落來，互阮通準備一隻山羊仔請你。」

16上主的使者給瑪挪亞講：「你給我留落來，我嘛𣍐食你的物件。你若欲獻燒化祭，著獻互上主。」瑪挪亞毋知伊是上主的使者。

17 瑪挪亞對上主的使者講：「請給我講你的大名。你的話實現的時，阮通報答你。」

18上主的使者給伊講：「你無應該問我的名。我的名是奇妙，得理解。」

19 瑪挪亞將一隻山羊仔及素祭，佇石磐頂獻互上主；彼時，瑪挪亞及伊的某看見一項奇妙的事。

20火焰對壇頂淐上天的時，上主的使者嘛對石磐頂的火焰中上去。瑪挪亞及伊的某看見，就仆佇土腳。

21上主的使者無閣出現互瑪挪亞及伊的某看見，瑪挪亞才知伊是上主的使者。

22 瑪挪亞給伊的某講：「咱一定會死，因為咱有看見上帝。」

23伊的某給伊講：「上主若欲互咱死，一定𣍐接納咱獻的燒化祭及素祭，𣍐互咱看見諸個代誌，嘛𣍐佇此陣互咱聽著諸個話。」

24後來，婦仁人生一個子，給伊號名叫做參孫；囝仔大漢，上主賜福伊。

25佇瑣拉及以實陶中間的瑪哈尼‧但，上主的神開始充滿伊。