詩篇 45 - 現代台語譯本漢字版(TTVH)-闽南语

可拉後代教示的詩，是愛情的歌，交互聖樂長；調，用「百合花」。頌讚君王婚禮的詩

1我的心淐出美好的話；

我欲唱為著王做的詩，

我的舌親像作家老練的筆。

2你比所有的查甫人較飄撇，

你講的話真優雅；

所以上帝賜福你，直到永遠。

3大權能的王，腰著縖劍，

顯示你的榮光及威嚴。

4為著真理、謙卑、公義，

你威嚴騎馬進前，百戰百勝；

你的正手做通驚畏的事。

5你的箭真利，射迵王對敵的心，

互𪜶攏倒佇你腳下。

6你的寶座是上帝所賜，續到永永遠遠；

你的國的權柄是正直的權柄。

7你意愛公義，厭惡不法。

所以上帝 — 你的上帝用歡喜的油抹你，

超過抹你的同伴。

8你的衣服有沒藥、沉香、肉桂的芳味；

對象牙的王宮有弦樂互你歡喜。

9你王妃的中間有列國的公主；

王后用上純的金妝飾，徛佇你正旁。

10查某囝仔啊，著斟酌聽，詳細想；

著𣍐記得你的百姓及你老父的家。

11王會戀慕你的媠；

伊是你的主，你著順服。

12 泰爾的人民會來送禮物；

百姓中的好額人會來對你求恩情。

13王的新娘佇宮內非常榮華；

伊穿金線繡的禮服。

14伊穿繡花的禮服互人導到王面前；

伴嫁的在室女隨佇後面嘛來到你面前。

15𪜶歡喜快樂，

互人導入王宮。

16你的子孫會續接你的列祖；

你欲設立𪜶佇全地做王。

17我欲互你的名代代受記念；

萬民會永永遠遠稱讚你。