1著佇春天雨期的時對上主求雨；
造烏雲及雷電的上主會落甘霖互所有的人，
互逐個人的田園生產。
2恁佇家內服事的神明烏白指示，
卜卦的濫糝報；
𪜶烏白解夢，𣍐當安慰人。
我的子民攏親像羊迷路，
𪜶因為無牧者受欺壓。
3我上主 — 萬軍的統帥對許個牧者發大受氣，
欲刑罰導頭的。
我欲看顧我的羊群猶大家，
互𪜶變做強猛的戰馬。
4所有的領袖攏會對猶大家出；
𪜶勇壯可靠親像厝角石，
親像布篷的杙仔，
親像交戰的弓。
5𪜶親像啲交戰的勇士，
踐踏對敵親像啲踏街路的土糜，
因為我上主及𪜶同在，
𪜶會勇敢交戰，
拍敗馬兵，互對敵見笑。
6我欲互猶大強盛，
互以色列勝利。
我欲憐憫𪜶，導𪜶轉來，
互𪜶感覺若親像我毋曾給𪜶棄拺。
我是上主 — 𪜶的上帝，
我欲聽𪜶的祈禱。
7 以色列會親像勇士；
𪜶會親像飲酒心快樂。
𪜶的子孫會看見來快樂；
𪜶的心會因為上主歡喜。
8我欲給𪜶呼倚來，
因為我有決定欲救贖𪜶。
𪜶的人口會加添，
親像以前赫呢多。
9我雖然有給𪜶分散去列國，
𪜶會佇遠遠的所在數念我；
𪜶及𪜶的子孫攏會活啲閣倒轉來。
10我欲導𪜶對埃及倒轉來，
嘛欲對亞述導𪜶出來，
導𪜶來基列及黎巴嫩，
到許個地區無夠所在通住。
11上主經過兇惡的海，
制伏海中的波浪，
互尼羅河深的所在焦去，
亞述的驕傲降做卑微，
埃及的權力消失。
12我上主欲互𪜶靠我堅強，
照我的意思生活行動。
上主按呢宣布。
Who We AreWhat We EelieveWhat We Do
2025 by iamachristian.org,Inc All rights reserved.
