1先知以利沙叫一個先知的學生來，給伊講：「你著準備出發，提此瓶油，去基列的拉末。
2到遐，著尋寧示的孫，約沙法的子耶戶，對伊同伴的中間請伊出來，導伊入內房；
3將瓶內的油倒佇伊的頭殼，講：『上主按呢講：我選立你做以色列的王。』了後你著開門，趕緊逃走。」
4此個少年的先知就去基列的拉末。
5伊到遐，看著眾軍官做夥坐佇遐；伊就講：「將軍，我有代誌欲給你講。」
耶戶講：「你欲給阮叨一個講？」
少年人應講：「將軍，就是你。」
6耶戶就起來，入去厝內；少年人用油倒佇伊的頭殼，對伊講：「上主 — 以色列的上帝按呢講：『我選立你做上主的子民以色列的王。
7你著刣死你的主人亞哈全家，互我通報復耶洗碧流上主的僕人眾先知及其他所有僕人的血。
8亞哈全家攏著滅亡；所有佇以色列中屬亞哈的查甫人，無論是自由的抑是無自由的，我攏欲給𪜶消滅。
9我欲互亞哈的家及尼八的子耶羅波安的家仝款，嘛及亞希雅的子巴沙的家仝款。
10狗欲佇耶斯列的田園食耶洗碧，嘛無人給伊埋葬。』」少年人就開門逃走。
11 耶戶出去，來到伊主人的軍官遐；有一個問伊講：「豈有什麼代誌？是按怎此個𤞚的來尋你？」
伊給𪜶講：「恁識彼個人，嘛知伊會講什麼。」
12𪜶講：「騙阮，你著給阮講。」
耶戶應講：「伊給我講：『上主按呢講：我選立你做以色列的王。』」
13𪜶逐個人趕緊用家己的外衫鋪佇崎仔的頂層，互耶戶徛佇頂面。𪜶歕哨角宣布講：「耶戶作王啦！」
以色列王約何蘭受殺害14按呢寧示的孫，約沙法的子耶戶背叛約何蘭。約何蘭及以色列軍兵曾防守基列的拉末，因為敘利亞王哈薛攻擊以色列。
15後來，約何蘭王倒去耶斯列，欲醫治伊及敘利亞王哈薛交戰的時受的傷。耶戶對許個軍官講：「既然恁擁護我作王，著毋通互人逃走去耶斯列報消息。」
16耶戶就駛戰車去耶斯列，因為約何蘭猶倒佇床裡。猶大王亞哈謝已經去佇遐探訪約何蘭。
17有一個守望的徛佇耶斯列城牆頂的守望台，看著耶戶的軍隊來，就講：「我看著一陣軍隊。」
約何蘭講：「派一個馬兵去接伊，續問伊講：『有平安無？』」
18彼個馬兵去迎接耶戶，講：「王啲問，有平安無？」
耶戶講：「平安無平安，無你的代誌。隨我後面！」
守望的報告王，講：「使者到𪜶遐，煞無倒轉來。」
19王閣派一個馬兵去。伊到𪜶遐，講：「王啲問，有順利無？」
耶戶講：「順利無順利，無你的代誌。隨我後面！」
20守望的報告王講：「伊去𪜶遐，嘛無倒轉來；駛車的衝真雄，看起來若親像是寧示的孫耶戶。」
21 約何蘭就講：「準備戰車。」𪜶就給伊準備。以色列王約何蘭及猶大王亞哈謝坐家己的戰車，出去見耶戶；𪜶佇耶斯列人拿伯的園抵著伊。
22 約何蘭看著耶戶就講：「耶戶，有平安無？」
耶戶應講：「你的老母耶洗碧的淫行邪術猶赫多，哪會平安？」
23 約何蘭就給車踅翻頭逃走，對亞哈謝喝講：「亞哈謝，反啦，反啦。」
24耶戶出力開弓，射著約何蘭的尻脊骿，箭對伊的心臟迵出去。伊就慄落去，死佇車內。
25耶戶對伊的軍官畢甲講：「給伊㧒佇耶斯列人拿伯的園裡。你著會記得你及我做夥坐車隨伊的老父亞哈的時，上主對亞哈的預言。
26上主有講：『我昨昏有看見拿伯及伊的子兒的血。我立誓，我欲佇此坵園報應亞哈。』今著照上主的話將約何蘭㧒𫢶此坵園。」
猶大王亞哈謝受殺害27 猶大王亞哈謝看著按呢，就向伯‧哈干的路逃走。耶戶趇伊，喝講：「嘛著給拍死。」接近以伯蓮上姑珥的山坪的時，亞哈謝佇車內受拍傷。伊逃走去米吉多，就死佇遐。
28伊的人臣用車給伊的屍體載去耶路撒冷，給伊安葬佇大闢城伊家己的墓，及伊的列祖做夥。
29 亞哈謝做猶大王的時，是佇亞哈的子約何蘭十一年。
耶洗碧王后受刣死30 耶戶到耶斯列，耶洗碧聽見，就梳粧打扮，對窗仔看外面。
31耶戶入城的時，耶洗碧對伊講：「刣死主人的心利
，你有平安無？」32 耶戶攑頭向窗仔看，講：「擁護我的人佇叨位？」有兩三個太監對窗仔俯啲看伊。
33耶戶講：「給伊㧒落來。」𪜶就將耶洗碧㧒落去；伊的血噴著牆壁及馬；耶戶駛戰車給伊的屍體軋過。
34耶戶入去，亦食亦飲，講：「恁去處理彼個受咒詛的婦仁人，續給伊埋葬，因為伊嘛是王的查某子。」
35毋拘𪜶去欲給伊埋葬，干焦尋著伊的頭殼及腳手的骨頭。
36𪜶倒來給耶戶報告，伊就講：「這抵抵照上主通過伊的僕人提斯比人以利亞所講的話：『狗欲佇耶斯列的田園食耶洗碧的肉。
37耶洗碧的身屍佇耶斯列的田園會及糞像款，無人認會出。』」
Who We AreWhat We EelieveWhat We Do
2025 by iamachristian.org,Inc All rights reserved.
