詩篇 57 - 現代台語譯本漢字版(TTVH)-闽南语

大闢閃避掃羅，匿佇洞內的時做此首金詩，交互聖樂長；調，用「毋通毀壞」。求幫贊的祈禱

1上帝啊，求你可憐我，可憐我；

我欲匿佇你遐，

匿佇你翼股的保護下，

聽候災難攏過去。

2我欲求叫至高的上帝，

逐項事攏給我完成的上帝。

3上帝會對天施恩救我，

互踐踏我的人失敗見笑。

上帝會對我施落慈愛及信實。

4我倒佇兇惡的人中間，

𪜶親像獅當等欲吞食人；

𪜶的嘴齒親像槍，親像箭，

𪜶的舌親像利的刀。

5上帝啊，願你的偉大𨃟過天，

你的榮光遍照全地。

6𪜶佇我的腳前設羅網，

欲互我屈服；

佇我的面前開陷坑，

家己顛倒跋落彼內面。

7上帝啊，我的心平靜，我的心堅定；

我欲吟詩，我欲唱歌稱讚。

8我的心神啊，著醒起來！

琴啊，瑟啊，著醒起來！

我欲給日頭叫醒。

9主啊，我欲佇萬民中感謝你，

佇列邦中唱歌稱讚你。

10你的慈愛若天赫呢高；

你的信實透到穹蒼。

11上帝啊，願你的偉大𨃟過天；

願你的榮光遍照全地。