以賽亞書 38 - 現代台語譯本漢字版(TTVH)-闽南语

希西家王破病(王下 20.1-11；代下 32.24-26)

1彼個時陣，希西家破病，病甲啲欲死。亞摩斯的子先知以賽亞來見伊，講：「上主按呢講：『你的後事著交代好勢，因為你會死，病𣍐好。』」

2 希西家就越轉身向壁，對上主祈禱講：

3「上主啊，求你帶念我按怎忠誠盡心服事你，做你看做好的事。」希西家就大聲啼哭。

4然後上主對以賽亞講：

5「你去給希西家講：『上主 — 你的祖先大闢的上帝按呢講：我有聽著你的祈禱，有看著你的目屎。看咧，我欲互你的歲壽加添十五年。

6我欲解救你及此個城脫離亞述王的手；我會保護此個城。』」

21 以賽亞講：「著提一塊無花果藥膏貼佇粒仔，王就會好。」

22希西家問講：「有什麼兆頭互我知，我會上去上主的殿？」

7 以賽亞講：「上主欲實現伊所講的代誌；這就是上主互你的兆頭。

8看咧，上主欲互照佇亞哈斯所造日規的日影倒退十度。」果然，日影倒退十度。

9 猶大王希西家病好了後寫此首詩：

10我想講：

我佇壯年的時著離開世間，

行入陰間的門，

𣍐當享受我所賰的日子。

11我想講：

佇活人的地，

我𣍐當閣見著上主；

佇世間的住民中，

我𣍐當閣看著人。

12我住的所在受拆，

親像牧者的布棚受徙走。

上主親像織布的人，

將我的性命捲起來，

閣對織布機給布剪斷；

伊佇一日的中間就欲結束我的性命。

13我歸暝哀哭直到清早；

伊親像獅拆碎我所有的骨頭；

佇一日的中間就欲結束我的性命。

14我親像燕仔啾啾叫，

親像粉鳥咕咕哮。

我攑頭向天，目睭煙暈厭倦。

我受欺壓，主啊，求你解救我。

15我會當講什麼？

伊給我應允，嘛有照按呢做。

我心神苦痛，

失眠，鬱卒過日。

16主啊，人靠你來活；

我的心神對你的應允得著氣力。

你有回復我的健康，

互我繼續活落去。

17我受赫呢大的苦痛，

確實有互我得著利益。

你拯救我的性命脫離滅亡的深坑，

將我的罪㧒佇你的尻脊後。

18因為陰府𣍐當感謝你，

死亡嘛𣍐稱讚你。

許個落陰府的人

𣍐當期待你的信實。

19活的人，只有活啲的人會當稱讚你，

親像我今仔日按呢。

作老父的欲互𪜶所有的子兒知你的信實。

20上主欲拯救我；

阮欲一世人佇上主的厝，

用弦樂伴奏唱歌。