羅馬書 7 - 現代台語譯本漢字版(TTVH)-闽南语

用婚姻做例

1兄弟姊妹，我是對恁識律法的人啲講，恁豈毋知，人活啲的時才受律法約束？

2舉一個例來講，結婚的婦仁人，丈夫猶活啲就受律法約束歸屬丈夫；丈夫若死就無閣受此個律法約束。

3所以，丈夫猶活啲，婦仁人若及別個查甫人做夥住，會互人叫做淫婦；丈夫若死，伊就無受此個律法約束，伊及別個查甫人做夥住嘛毋是淫婦。

4我的兄弟姊妹，親像按呢，恁及基督的身軀結合及伊同死，已經及律法斷絕關係，無受約束，會當歸屬別人，就是彼位對死人中閣活的基督，互咱通為著上帝結果子。

5咱照人肉體的本性啲活的時，咱犯罪的慾念受律法激起，佇咱身軀的各肢體運作，結死亡的果子。

6毋拘，現在咱已經脫離律法，及彼個束縛咱的斷絕關係。按呢，咱服事上帝，毋是照律法的舊方式，是照聖神的新方式。

律法及罪

7按呢，咱欲講什麼？律法是罪是無？絕對毋是！不過若無律法，我就毋知什麼是罪。律法若無講「毋通貪心」，我就毋知什麼是貪心。

8罪利用誡命尋機會佇我心內引起逐款的貪心。無律法，罪就無作用。

9以前無律法，我嘛啲活；誡命一下來，罪活起來，

10我就死去。對我來講，本來欲互人活的誡命，顛倒互人死。

11因為罪利用誡命尋機會欺騙我，嘛利用誡命害死我。

12所以，律法是神聖；誡命嘛是神聖、公正，閣良善。

13若按呢講，彼個良善的害死我是無？絕對毋是！是罪利用彼個良善的害死我，互罪惡的本質顯露；按呢，罪利用誡命互伊極其惡毒的本質閣較顯露出來。

人的自我衝突

14咱知，律法是屬靈的，毋拘我是屬肉體的，已經出賣互罪作奴隸。

15我無明白家己的所做，因為我愛做的，無去做；我無愛做的，顛倒去做。

16我若做我無愛做的，就是承認律法是好。

17按呢，啲做我無愛做的毋是我，是𫢶佇我內面的罪。

18我知，佇我本性內面無良善；我有做好的意願，毋拘無做好的氣力。

19所意愛的好，我無去做，無意愛的歹，我顛倒去做。

20我若做我無意愛的，就毋是我本身啲做，是𫢶佇我內面的罪啲做。

21按呢，我有發見一個法則，就是，我想欲做好的時，歹給我纏啲。

22我內面的彼個人意愛上帝的律法，

23毋拘我看出，佇我的身軀有另外一個法則及我心思的法則啲交戰，掠我做囚犯來降服我身軀內面的罪的法則。

24我此個人有夠悽慘！什麼人會當救我脫離此個致到死的身軀？

25感謝上帝，通過咱的主耶穌基督伊有救我！

按呢，我的處境，一方面是用心思順服上帝的律法，另外一方面是用肉體順服罪的法則。