以賽亞書 15 - 現代台語譯本漢字版(TTVH)-闽南语

上帝欲毀滅摩押

1這是有關摩押的信息：

摩押的亞珥荒廢，

佇一暝的中間攏無去啦！

摩押的基珥荒廢，

佇一暝的中間攏無去啦！

2 底本的人民上去𪜶的寺廟，

佇遐啼哭。

摩押人為著尼波及米底巴哀哭。

所有的人頭殼剃光光；

逐個人的嘴鬚剃了了。

3𪜶佇街路攏縖麻布，

佇廣場及家己的厝尾頂啼哭，

目屎㴙㴙滴。

4 希實本及以利亞利出聲哭；

𪜶悲哀的聲佇雅雜都聽會著。

所以，摩押武裝的軍人大聲喝；

𪜶的心失膽，愕愕惙。

5我的心為著摩押啼哭；

𪜶的難民逃走去瑣珥，

到伊基拉‧施利施亞。

𪜶𬦰上魯希的山坪，那𬦰那哭；

𪜶逃走去何羅念，因為受毀滅大聲哀哭。

6 寧林溪的水焦去；

溪邊的草凋去，

菜蔬死去，

青翠的物攏無去。

7所以，𪜶得著的財物，

所有囤積的物件，

攏會搬去柳樹溪彼旁。

8因為哀慘的聲已經傳遍摩押四境；

啼哭的聲迵到以基蓮，

傳到比珥‧以琳。

9 底們河流的水攏是血；

毋拘，我上帝欲加添底們的災難，

有獅來追趇摩押的難民

及彼所在流亡死無去的人。