1哈利路亞，稱讚上主！
著感謝上主，因為伊至善；
伊的慈愛續到永遠！
2啥人會曉講起上主的大權能？
啥人會當完全表明對伊的稱讚？
3所有維護公平，
不時實踐公義的人真有福氣！
4上主啊，你恩待你子民的時，求你會記得我；
你拯救𪜶的時，求你眷顧我。
5求你互我看見你的選民興旺，
互我及你的國民分享快樂，
及你的子民做夥誇耀。
6阮及阮的祖先仝款有犯罪；
阮偏離正路做歹。
7阮的祖先佇埃及無明白你所做的奇事，
𣍐記得你豐盛的慈愛，
反轉佇紅海背叛你。
8毋拘主，因為伊的名的緣故，解救𪜶，
欲顯明伊的大權能。
9伊一下喝紅海，海就焦去；
伊導𪜶經過海深的所在，若啲經過焦地。
10伊救𪜶脫離怨恨𪜶的人的手，
對對敵的手中解救𪜶。
11𪜶的對敵攏互水淹密，
連一個都無留啲。
12彼陣，𪜶才信伊的話，
才唱歌稱讚伊。
13𪜶真緊就𣍐記得伊的所做，
無聽候伊的指示。
14𪜶佇曠野大大起貪慾，
佇荒埔試探上帝。
15𪜶所求的，伊有互𪜶，
毋拘嘛互𪜶攏衰荏消瘦。
16𪜶佇營中怨妒摩西
及上主聖別的亞倫。
17地就裂開，吞滅大坍，
掩密亞比蘭彼群人。
18有火佇𪜶中間𤏸起來，
火焰燒滅許個歹人。
19𪜶佇何烈山造牛仔，
仆拜所鑄的像。
20按呢，𪜶用食草的牛仔做像，
替換上帝的榮光。
21𪜶𣍐記得給𪜶拯救的上帝；
伊曾佇埃及做大代誌，
22佇含的地行奇事，
佇紅海做通驚的事。
23所以，伊講欲給𪜶消滅；
若毋是伊所揀選的摩西徛佇伊面前極力申訴，
消除伊的受氣，伊已經給𪜶消滅啦。
24𪜶看輕彼個好的地，
毋信伊的話；
25𪜶佇家己的布棚內埋怨，
毋聽趁上主的話。
26所以伊對𪜶攑手立誓，
欲互𪜶死佇曠野；
27互𪜶的子孫死佇外國，
四散佇逐所在。
28𪜶鬥陣去拜比珥的巴力，
食獻互無性命的神明的祭物。
29𪜶按呢做，惹起伊的受氣，
就有瘟疫佇𪜶中間傳染。
30彼時非尼哈起來替𪜶排解，
瘟疫就煞。
31此個代誌上帝給伊算做義，
對彼時起，直到永遠。
32𪜶佇米利巴的水泉邊閣惹上主受氣，
為著𪜶的緣故，摩西受連累；
33因為𪜶背叛上帝，
致到摩西講出匆碰的話。
34𪜶無聽趁上主的吩咐，
無剿滅外族的百姓；
35反轉及外邦人通婚，
學𪜶的所做，
36服事𪜶的偶像；
結果家己跋落陷阱。
37𪜶將子、查某子做祭物獻互鬼神；
38𪜶流無罪的人的血，刣家己的子、查某子，
將𪜶做祭物獻互迦南的偶像，
彼個地就受著血污染。
39按呢，𪜶受家己的行為污染，
𪜶的所做犯著淫行。
40所以，上主對伊的子民發受氣，
厭惡伊的產業以色列。
41伊將𪜶交佇外邦人的手，
互怨恨𪜶的人管轄𪜶。
42𪜶的對敵壓制𪜶，
𪜶就屈服佇對敵的手下。
43上主一遍閣一遍解救𪜶；
毋拘𪜶故意背逆伊，
因為家己的罪惡致到墮落。
44伊聽著𪜶的哀叫，
體貼𪜶的困苦。
45伊為著𪜶想起伊的約，
因為豐盛的慈愛回心轉意，
46互𪜶得著所有掠𪜶的人的憐憫。
47上主 — 阮的上帝啊，求你拯救阮，
聚集阮，導阮對列國轉來，
互阮通感謝你的聖名，
用稱讚你做阮上大的歡喜。
48願稱讚歸互上主 — 以色列的上帝，
對永遠到永遠。
願全體人民攏講：阿們！
哈利路亞，稱讚上主！
Who We AreWhat We EelieveWhat We Do
2025 by iamachristian.org,Inc All rights reserved.
