歷代志上卷 20 - 現代台語譯本漢字版(TTVH)-闽南语

大闢攻取拉巴城(撒下 12.26-31)

1隔年春天，列王出戰的時，約押導軍兵攻擊毀壞亞捫人的地，圍攻拉巴城；大闢留佇耶路撒冷。約押攻佔拉巴，給城徹底破壞。

2大闢提著米勒公

頭殼頂的王冠，是用大約三十五公斤的金造的，閣有鑲寶石。人將此頂王冠戴佇大闢的頭殼。大闢對城內取真多財物，

3閣給城內的人民掠出來，互𪜶用鋸仔、鐵耙仔，及斧頭做苦工；大闢攏用此款方法對待亞捫許個城的人。後來，大闢及所有的軍兵倒去耶路撒冷。

攻打非利士人(撒下 21.15-22)

4後來，以色列人佇基色及非利士人交戰。戶沙人西比該刣死一個大漢族的後代，伊的名叫做細派；非利士人就屈服。

5𪜶閣及非利士人交戰，彼時睚珥的子伊勒哈難刣死迦特人歌利亞的兄弟拉哈米；此個人的槍柄親像織布機的車心赫粗。

6𪜶閣佇迦特交戰。佇遐有一個大漢人，手及腳攏有六支指頭仔，共二十四支，伊嘛是大漢族的後代。

7此個人對以色列的軍隊嗆聲的時，大闢的兄哥示米亞的子約拿單給伊刣死。

8諸個人攏是迦特大漢族的後代；攏互大闢及伊的軍兵刣死。