以賽亞書 17 - 現代台語譯本漢字版(TTVH)-闽南语

上帝審判大馬士革及以色列

1這是有關大馬士革的信息：

看咧，大馬士革無閣是城市，

一定會變做糞埽堆。

2 亞羅珥的城市會永遠荒廢，

變做飼羊的所在；

羊倒啲歇睏嘛𣍐受嚇驚。

3 以色列𣍐閣有要塞，

大馬士革嘛𣍐閣有主權；

所賰的敘利亞人

會親像以色列人失去光彩。

上主 — 萬軍的統帥按呢宣告。

4佇彼日，以色列的光彩會消失，

伊肥軟的身軀會消瘦落肉；

5親像收割了的麥園，賰的麥仔互人拾去；

親像利乏音山谷收割過的麥園，賰的麥穗嘛互人拾了了。

6 以色列人中間只有少數會留啲；

𪜶會親像抵仔收成了的橄欖樹，

樹頂只有賰兩三粒橄欖，

下面的枝上多嘛才賰四五粒。

上主 — 以色列的上帝按呢宣告。

7佇彼日，人會轉向𪜶的創造主；𪜶的目睭會仰望以色列神聖的上帝。

8𪜶𣍐閣歸向𪜶親手起的祭壇，嘛𣍐閣倚靠𪜶指頭仔造的亞舍拉女神的柱像及香台。

9佇彼日，以色列防備堅固的城市會拋荒荒廢，親像亞摩利人及希未人對以色列人面前逃走棄拺的城市。

10 以色列啊，你已經𣍐記得拯救你的上帝，

𣍐記得互你避難的大石磐，

去拜外國的神明。

你親像有栽上好的樹欉，

毋拘接外來的樹枝。

11雖然佇栽種彼日就茁芛，

佇栽種彼早起就開花，

總是收成會落空；

彼日，只有病疼及大痛苦。

對敵受拍敗

12聽咧，有真多人民啲喧嘩；

𪜶喧嘩的聲親像大海嘩嘩哮！

列國若大湧啲衝擊，

親像波浪直直衝。

13列國雖然若大水直直潑，

上帝一下責備，𪜶隨時走離離，

親像粗糠互山頂吹落來的捲螺仔風掃走，

親像草幼仔互大風吹散。

14看咧！暝時，有恐怖，

日未出，𪜶就攏消失。

這就是搶阮的人應受的報應，

是劫阮的人應有的命運。