1列國啊，倚來聽！
萬民啊，注意聽！
全地及地上的萬物，
世界及住佇彼內面的，攏著聽！
2因為上主對萬國發受氣，
對萬軍發大受氣。
伊欲給𪜶消滅，互𪜶出在人刣。
3受刣死的會互人挕拺；
身屍的臭味淐高。
眾山會因為𪜶的血反紅。
4天頂的萬象會消失；
天會親像冊捲起來。
天頂的星辰會落落來，
親像葡萄樹葉凋去，
親像無花果樹焦去。
5我的劍已經佇天頂出現。
看咧，此支劍欲降落佇以東，
臨到許個我判做應該滅亡的人民。
6上主的劍歸支攏血及油，
就是羊羔及山羊的血，
以及羊腰子的油。
因為佇波斯拉有祭物欲獻互上主，
佇以東有大屠殺。
7野牛會及𪜶做夥受刣，
牛仔子及牛嘛會按呢。
𪜶的土地會互血沐紅；
𪜶的土歸個攏油。
8因為上主有報仇的日，
為著錫安的案件有申冤的年。
9 以東的溪水攏變打馬膠，
土變做硫磺，
土地變做啲燒的打馬膠。
10暝日火攏𣍐熄，
火煙永遠啲淐。
土地會代代拋荒，
永遠無人對遐經過。
11毋拘鵜鶘及豪豬會佔遐，
貓頭鳥及烏鴉會佇遐作巢。
上主欲用渾沌做繩線給伊量，
用空虛做墜繩給伊測。
12𪜶的王國會滅亡；
𪜶的貴族及官長會攏消失。
13宮殿會發莿，
蒺藜及雜草會蓋滿要塞；
遐會成做豺狼住的所在，
鴕鳥佇遐作巢。
14曠野的走獸及豺狼會住佇遐，
野山羊會及伊的同伴相對叫；
夜間的鬼怪會佇遐歇睏，
佇遐尋著安歇的所在。
15佇遐有箭頭蛇作巢，生卵，
孵蛇子，照顧蛇子；
鴟鴞佇遐聚集，
公的母的攏集做夥。
16恁著查考，著讀上主的冊；
無一項動物無佇彼內面，
公的母的對對攏有。
因為上主的嘴有命令，
伊的氣給𪜶聚集。
17伊為著𪜶抽籤，
親手用索給𪜶分地界；
𪜶會永遠得著所分的地區，
世世代代住佇遐。
Who We AreWhat We EelieveWhat We Do
2025 by iamachristian.org,Inc All rights reserved.
