耶利米書 47 - 現代台語譯本漢字版(TTVH)-闽南语

1 埃及王攻擊迦薩以前，上主針對非利士人，對先知耶利米講話。

2上主講：

「你看，北方的河水漲高，

成做一條氾濫的大河，

淹過全地及其中所有的，

蓋過城及城內的住民；

人欲喝咻，

境內的住民攏大聲啼哭。

3做老父的一下聽著戰馬馬蹄的聲、

戰車互地振動的聲、

車輪翱過的聲，

雙手就痠軟，

無法度越轉身救家己的囝仔。

4時日一下到，

上主會毀滅所有的非利士人，

消滅賰落來欲幫贊泰爾及西頓的人；

上主欲毀滅非利士人，

消滅迦斐託海島所賰的住民。

5 迦薩剃光頭悲傷，

亞實基倫嘛烏有去啊。

佇平原所賰的非利士人啊，

恁割家己的身軀哀傷，欲到底時？

6恁叫講：『上主的刀劍啊，

你到底時才會安靜？

著勼入去刀鞘，毋通閣振動。』

7伊哪有可能安靜咧？

上主命令伊去攻擊亞實基倫，

攻擊住佇海邊的住民；

我上主派伊去，此件事已經定著。」