1有一遍，耶穌佇一個所在啲祈禱。伊祈禱煞的時，有一個門徒給伊講：「主啊，約翰有教伊的門徒祈禱，請你嘛教阮祈禱。」
2耶穌給𪜶講：「恁祈禱的時，著按呢講：
父啊，願你的聖名受尊崇。
願你施行主權。
3求你逐日賜阮所需要的食物。
4求你赦免阮的罪，
因為阮家己嘛有赦免所有辜負阮的人。
求你毋通互阮陷落擔當𣍐起的試探。」
5耶穌閣對伊的門徒講：「恁中間有什麼人半暝去朋友遐，給伊講：『朋友，請你借我三塊餅，
6因為我有一個朋友旅行來到阮遮，我無物件通請伊。』
7你的朋友會對厝內應講：『給我吵，門已經關，我及囝仔佇眠床啲睏啦，𣍐當起來提互你。』
8我給你講，雖然彼個人𣍐因為伊是朋友起來提餅互伊，嘛會因為伊迫切懇求，起來提所需要的物互伊。
9「所以，我給恁講：求，會得著；尋，會尋著；拍門，會給恁開。
10因為求的，就得著；尋的，就尋著；拍門的，就給伊開。
11恁中間作老父的，家己的子給恁討魚，豈會掠蛇互伊？
12抑是給恁討蛋，豈會掠蝎仔蟲互伊？
13恁雖然歹，猶會曉提好物互恁的子兒，何況恁的天父，伊一定會將聖神賜互對伊祈求的人！」
耶穌及別西卜(太 12.22-30；可 3.20-27)14耶穌趕一個啞口鬼；鬼一下出去，彼個𣍐講話的人就講話，群眾攏著驚。
15毋拘，其中有人講：「伊靠鬼王別西卜趕鬼。」
16閣有一寡人欲試探耶穌，一直要求伊行對天來的神跡。
17耶穌知影𪜶啲想什麼，就給𪜶講：「國家家己紛爭，會荒廢；家庭家己紛爭，會倒壞。
18撒旦若家己紛爭，撒旦的國哪徛會牢？恁講我是倚靠別西卜趕鬼。
19我若靠別西卜趕鬼，恁的子弟是靠什麼人趕鬼？按呢，恁家己的子弟會給恁判罪。
20不過我若是靠上帝的氣力啲趕鬼，上帝的主權就已經佇恁中間實現啦。
21「勇士武裝全備顧守家己的厝，伊的財物就安全。
22毋拘有一個比伊較勇的人來攻擊，拍贏，就將伊所倚靠的武器搶去，閣將所搶的財物分了了。
23「無為我的就是反對我；無及我做夥收集的就是啲拍散。」
邪神倒轉去(太 12.43-45)24「邪神離開所附身的人了後，佇無水的地區行透透，欲尋一個歇睏的所在，尋攏無，就講：『我欲轉來去我出來彼間厝。』
25伊轉去，看著厝內掃甲真清氣，閣整理好勢。
26後來，伊去導七個比伊較歹的邪神來，入去遐住。按呢，彼個人的結局比起頭閣較慘。」
真正的福氣27耶穌啲講諸個話的時，群眾內面有一個婦仁人大聲對耶穌講：「生你，互你𠲿奶的婦仁人真有福氣！」
28不過耶穌應講：「聽上帝的話閣遵守的人閣較有福氣！」
群眾要求神跡(太 12.38-42；可 8.12)29群眾愈來愈多，耶穌就講：「此世代真正是邪惡的世代！𪜶要求神跡，毋拘約拿的神跡以外，𣍐閣有神跡互𪜶。
30抵親像約拿成做尼尼微人的神跡，人子嘛欲成做此世代的人的神跡。
31佇審判的時，南方的女王會及此世代的人做夥起來給𪜶定罪，因為伊有對地的極頭來聽所羅門智慧的話。恁看，有比所羅門閣較偉大的佇遮！
32佇審判的時，尼尼微人會及此世代的人做夥起來給𪜶定罪，因為尼尼微人聽著約拿的傳道了後攏有悔改。恁看，有比約拿閣較偉大的佇遮！」
目睭是身軀的光(太 5.15；6.22-23)33「無人點燈下佇人看𣍐著的所在，抑是蓋佇斗下；一定是下佇燈台頂，通互入來的人看著光。
34你的目睭是身軀的燈。你的目睭若金，歸身軀就光明；你的目睭若花，歸身軀就烏暗。
35所以，著小心，毋通互你內面的光變做暗。
36你歸身軀若攏光明，連一點仔烏暗都無，就會親像燈光映映啲給你照，完全光明。」
耶穌責備法利賽派的人及經學教師(太 23.1-36；可 12.38-40)37耶穌啲講諸個話的時，有一個法利賽派的人請伊食飯，伊就入去坐桌。
38彼個法利賽人看著伊食飯無先洗手，感覺真奇怪。
39主就給伊講：「恁法利賽人只有將杯及盤的外面洗清氣，毋拘恁的內面充滿貪慾及邪惡！
40恁諸個戇人！彼位創造外面的上帝豈毋是嘛有創造內面？
41著提杯及盤內面的物件去賑濟，按呢恁的一切就攏清氣。
42「恁諸個法利賽人慘啊！因為恁將薄荷、芸香，及逐款菜蔬奉獻十分一互上帝，毋拘無重視公義及疼上帝。其實諸個才是恁應該實行的，其他的嘛毋通忽略。
43「恁諸個法利賽人慘啊！因為恁愛佇會堂坐高位，佇市場口互人給恁請安。
44恁慘啊！因為恁親像看𣍐出的墓，人對頂面行過嘛毋知。」
45有一個律法教師給耶穌講：「老師，你講諸個話嘛是啲侮辱阮！」
46耶穌應伊講：「連恁諸個律法教師嘛慘啊！因為恁將擔無法的重擔互人擔，家己連一支指頭仔都毋肯振動來減輕𪜶的重擔。
47恁慘啊！恁的祖先刣死許個先知，恁給𪜶造墓。
48按呢，恁家己證實，嘛贊成祖先所做的代誌，因為𪜶刣死先知，恁給𪜶造墓。
49所以，上帝的智慧嘛有講：『我欲差先知及使徒去𪜶遐，其中有的會互𪜶刣死，有的會互𪜶迫害。』
50-51按呢，對創造天地以來，就是對亞伯起直到佇祭壇及聖所的中間互人殺害的撒迦利亞為止，𪜶所流的血，此世代的人攏著還。著，我給恁講，許個債攏會給恁此世代的人討。
52「恁諸個律法教師慘啊！因為恁將開智識的門的鎖匙給人提走，家己毋入去，欲入去的人，恁煞給𪜶阻擋！」
53耶穌對遐出來的時，經學教師及法利賽人就極力給伊攻擊，迫伊講較多話，
54當等伊講毋著，通掠伊的話縫。
Who We AreWhat We EelieveWhat We Do
2025 by iamachristian.org,Inc All rights reserved.
