羅馬書 12 - 現代台語譯本漢字版(TTVH)-闽南语

服事上帝的生活

1所以，兄弟姊妹，因為上帝的憐憫，我勸恁著將家己的身軀獻互上帝做活活的祭，是聖潔，伊所歡喜的；這是恁合宜的敬拜。

2毋通互世俗同化，顛倒著互上帝給恁改造，心志得著更新，互恁通辨別什麼是上帝所歡喜，看做好，閣完全的旨意。

3靠上帝互我的恩賜，我對恁逐個人講：毋通將家己看傷高，著照上帝賜互恁逐個人信心的份量慎重評價家己。

4親像一個身軀有真多肢體，逐個肢體各有無相像的功能。

5雖然咱有真多人，毋拘佇基督是一體，互相做肢體。

6照上帝賜互咱的恩典，咱逐個人有得著無相像的恩賜：宣講信息的人著符合信心宣講；

7服事的人著全心服事；教導的人著全心教導；

8勸勉的人著全心勸勉；賑濟的人著慷慨；領導的人著熱誠；做慈善的人著甘心樂意。

9疼著誠心誠意；著怨恨歹，堅持好。

10著用兄弟愛互相相疼；著真心相敬重。

11毋通貧憚；心志著熱誠，繼續服事主。

12著囥向望來歡喜；著忍受患難；著不時祈禱。

13著幫贊恁中間散赤的信徒；著好款待出外人。

14著祝福迫害恁的人；著祝福，毋通咒詛。

15著及歡喜的人做夥歡喜，及哀哭的人做夥哀哭。

16著同心合意；毋通驕傲；著做貧賤的人的同伴；毋通自作聰明。

17毋通用歹報歹；著做眾人看做好的事。

18著盡所會及眾人和睦相處。

19親愛的兄弟姊妹，毋通為著家己報冤，寧可互上帝替恁受氣，因為聖經有記載：「主講：申冤在佇我，我會報應。」

20毋拘聖經嘛有記載：「你的對敵若枵，著互伊食，嘴焦，著互伊飲；因為你按呢做，若準將啲𤏸的火炭疊佇伊的頭殼頂，互伊面紅知通見笑。」

21所以，毋通互歹贏過恁；著用好較贏歹。